Shillong, Ïaïong 30
Ka Voice of the People Party (VPP) State Youth Wing, ha ka 30 tarik u Ïaïong, 2026, ka la leit ban ïakynduh ïa ka Director ka Directorate of Health Services (DHS), ka Dr.Mylliem Umlong ban pan jingshai halor ka jingujor ki samla aplai kam haba ïadei bad ka jingbym biang ka rukom thep kam ha Shillong Medical College.
Haba kren sha ki lad pathai khubor, u Dr.Jeremiah Kharshiing, dkhot ka Youth Wing, u la ong na ka liang katei ka kolej ka la pynbna ïa ka kam Librarian, hynrei kaba sngewsih ka long ba uba ïoh ïa katei ka kam um dei uba la biang katkum ki kyndon kiba la buh.
U la ong ba katkum ki kyndon ba la buh kiba lah ban aplai ïa katei ka kam, kin hap ban don kumba 15 snem ka jingtbit ne experience hynrei uba ïoh u don tang shi snem ei-ei katba kiwei pat kiba la biang lut nadong shadong kim ïoh satia ïa katei ka kam.
Nalor kata, u la ong haba ïakren, na ka liang ka Director kam shym don jingtip eiei halor kane ka kam.
“U ne u briew uba la ïoh ha katei ka kam, u dang don jingtbit tang kumba 1 snem tam ei-ei bad kumno u ne un ïoh ha katei ka kam? Haba ki pan 15 snem ka jingtbit, bad balei ka tnad kam shym la weng shuwa ïa une u briew, namar kiba bun ki khynnah kiba la don ka ‘experience’ kumba 15 snem,” buh jingkylli u Dr.Jeremiah.
U la ïathuh ruh ba une u briew ba ïoh ïa katei ka kam u ïoh tang 24 mark bad u bym pat don ka jingtbit ne experience ha ka kam kumba la buh 15 snem, katba kiwei ki khynnah kiba la don jingtbit 15 snem bad ki ïoh 25 mark hynrei ki shah kyntait ha ka rukom thep kam ha Shillong Medical College. “Kane ka pyni ka jingkylli kaba heh bha, ba balei bad ha kano ka rukom la thungkam ïa une u briew”, u la bynrap.
Kumta u la ïathuh ba na ka liang ka Director ka la kular ban shimkhia haba ïadei bad kane ka kam ka jingbym biang ban thepkam ha Shillong Medical College.
