Khliehriat, Ïaïong 30
Ka Ïingkashari ka Kong B. Khriam, Special Judge (POCSO), East Jaiñtia Hills District, Khliehriat ka la rai pynrem ïa u Emlang Dkhar hapoh ki kyndon ka POCSO Act da kaba set phatok 10 snem ha ryngkat ka kuna kaba T.25,000.
Kane ka rai ka dei kaba la mih na ka Case Khliehriat Women PS Case No. 51(12)2019 U/S 5(n)/6 jong ka POCSO Act R/w Sec. 506 IPC ba la register hapoh Khliehriat Women PS bad ba la tohkit da ka Women Police SI S. Kharsati.
U briew uba la shah kynnoh donkti u Emlang Dkhar uba la shah kem noh bad hadien la charge sheet ha ka 30 tarik Nailur 2020.
Hadien ba la pyndep ïa ka jingbishar, ka Ïingkashari ha ka 22 tarik Ïaïong 2026, ka la rai pynrem ïa u Emlang Dkhar halor katei ka kam bymman hapoh ka kyndon 18/5(n) POCSO Act, 2012, R/w Section 506 IPC da kaba rai set phatok shiphew snem ha ryngkat ka kuna kaba T.25,000.
Ha kawei pat ka khubor, ka Ïingkashari ka Kong B. Khriam, District and Sessions Judge, East Jaiñtia Hills District, ka la rai pynrem ïa u runar uba kyrteng u Sweet Phawa namar ka jingdonkti ha ka kam leh beijot da kaba set phatok 20 snem ha ryngkat ka kuna T.60,000.
Kane ka jingjia ka la mih na ka Case ka Khliehriat PS Case No. 214(10) 2014 U/S 376/506/392 IPC ba la register hapoh Khliehriat Women Police Station bad ba la tohkit da ka Women Police SI K. Lyngdoh. Une uba la shah kynnoh donkti u Sweet Pala ba ju khot sin Koi u la shah kem noh bad la charge sheet ha ka 11 tarik Lber 2015.
Hadien ba la dep ka jingbishar, ka Ïingkashari ka Kong B Khriam District and Sessions Judge ka la rai pynrem ïa u Sweet Pala hapoh ki kyndon U/S 376(1) IPC, 506 Part-II IPC bad 392 IPC da kaba set phatok 20 snem ha ryngkat ka kuna kaba T.60,000.
