Shillong, Ïaïong 30
Ha ka jingïaid lynti ka Voice of the People Party (VPP) ban hiar sha man la ki district ban pynlong jingïalang paidbah ban pyrshah ïa ka Sorkar MDA, ba la lamkhmat da ka National People’s Party (NPP), ka VPP ha ka 30 tarik u Ïaïong, 2026, ka la hiar sa sha Ri Bhoi District, ban pynlong ïa ka jingïalang paidbah ha Umsning Town Dorbar Hall.
Ha kane ka sngi, la ïadonlang u Bah Ardent Miller Basaïawmoit, President ka VPP bad MLA na Nongkrem ha ryngkat ka jingïadonlang, u Bah Brightsta-well Marbaniang, MLA ka Mawlai, ki MDC VPP na katei ka District, lem bad ki paidbah kiba la ïapoi ban shah shkor ïa katei ka jingïalang.
U Bah Ardent Miller Basaiawmoit haba kren ha ka jingïalang u la ïathuh ba ki don haduh shiphew tylli ki mat jingdawa ka VPP na ka Sorkar Jylla, kiba dei ki mat na ka bynta ka bha ka miat bad ka jingmyntoi jong ki paidbah kiba ka Sorkar ka dei ban pynurlong.
U Bah Ardent u la ïawer ïa ki paidbah ba kin wan ban ïa shimbynta sha ka jingïakhih paidbah kaba ka party kan sa pynlong noh shen.
U Bah Ardent u la ther tyngeh ba ki don kiba kynnoh ba ka jingleit ka VPP sha ka jaka shongshah thngan ki Samla ka GTF, ka jingpynlong jingïalang ha Motphran kadei ka jingleh politik, hynrei kadei ba ka VPP ka burom ïa ki paidbah.
“Ka VPP ka thrang ban ai ïa kaei-kaei kaba bha tam na ka bynta ki paidbah. Ka jingpynlong ka VPP ïa ki jingïalang paidbah ha man la ki jaka kadei ban pynsngewthuh sha ki paidbah ba kin long kiba shemphang, kiba stad, kiba shlur bad kiba ïatylli,” u la ong.
U la kynnoh ruh ba ka Sorkar MDA ka thmu ban pynpait pynpra ïa ka jaitbynriew, ba mynta lada ki wanrah kano-kano ka roi ka par, haba don kiba pyrshah ka Sorkar ka pynmih ar tylli ki bor shnong bad pynïapait ban pynïashrut. Kane ka Sorkar kadei kaba shun ïa u trai muluk trai jaka.
“Ngi wer ïa ki paidbah ban ïa mih paidbah lang bad ka VPP ban ker tawiar ïa ka Secretariat ban dawa pynduh ïa ka jingdie lilam, ka jingdie tuh bad ka jingdie duh ïa ki jaka raid jong ngi. Ka jingïakhun jong ngi kam dei ka jingmyntoi ka party hynrei kan dei na ka bynta ki paidbah,” la ong u Bah Ardent.
