Jowai, Jymmang 01
Ka Dorbar Shnong Lapangap ka la rai ban tur paidbah sha Secretariat ha ka 6 tarik Jymmang halor ka jingeh jong ki nongshong shnong haba ïadei bad ka rep ka riang.
Ïa kane ka rai la shim ha ka jingïalang Dorbar kaba la long ha ka step 1 tarik Jymmang.
U Symbud Waheh Shnong, u Bah Samkhih Situng haba kren hadien ka Dorbar u la ong, “Mynta ka step, ngi la lum ïa ka dorbar ban pyrkhat halor ki jingeh ba ki nongshong shnong ki mad khamtam ha ka kam rep kam riang bad da kawei ka sur la rai ban tur paidbah sha Secretariat ha ka 6 tarik Jymmang.”
U la pyntip ba ki mat jingdawa ka Dorbar Shnong Lapangap na ka Sorkar Meghalaya, ki long ban ïoh rep suk rep saiñ katkum ka hok kynti jong ki nongshong shnong.
Kumjuh, ban weng mardor ïa ki pulit ka Assam kiba shna ktem be-aiñ ha u Lumpynthor ba dang hap hapoh u pud u sam jong ka Dorbar shnong Lapangap, namar ka jingdon jong ki ha utei u lum, ki long mawjynthut bad kabu bah ïa ki nong Karbi ban wan pynthut ïa ka rep ka riang ki nongrep ka shnong Lapangap.
Nalor kane, ban pyndam ïa u ‘GPS Line’ ba paw ha ka ‘Google Map’ ba la pruid da ka Sorkar Assam katba ym pat dep ïa ka jingïapynbeit pud hapdeng ka Sorkar Meghalaya bad Sorkar Assam.
La dawa ruh ban siew bai lutksan sha baroh ki nongrep ka shnong Lapangap kiba shah ktah ha u snem 2025 namar ka jingbym ïohlad ban ot ïa u kba ha ka por kaba biang.
