Nongpoh, Jymmang 01
U Bah Mayralborn Syiem, MLA ka Nongpoh konstitwensi ha ka sngi Palei u la leit ban plie paidbah ïa ka jaka kynshew ksai Ryndia jong ki nongthaiñ jaiñ ka Raid Nongtluh kaba la shna ha ka shnong Umkon, kum shi bynta ban kyntiew ïa ka kam thaiñ jaiñ Ryndia hapoh ka Ri Bhoi District.
Katei ka jaka kynshew ne pynlang ksai Ryndia kaba la tip ha ka ktien nongwei kum ka Yarn Bank ka dei kaba hap hapoh ka jingkhmih jong ka Umkon IVCS bad kaba tei ha ka jinglut kaba T.7 lak na ka skhim MegLAMP jong ka Meghalaya Basin Management Agency (MBMA) bad T.42 lak na ka skhim FOCUS kum ka bai seng ba kin lah ban pyntreikam bad pyntyllun ïa ki kam ki jam.
Ha kane ka sngi ba la plie paidbah ïa katei ka jaka kynshew ksai Ryndia, la wan ruh ban ïadon ryngkat da u Bah A Suting, Deputy Director ka MBMA, u Bah Nicholas Syngkli, Chairman ka Umkon IVCS nalor ki nongïalam shnong, ki nongthaiñ jaiñ bad kiwei kiwei de ki nongkitkam ka Umkon IVCS.
Ka jinglah ban plie paidbah noh ïa katei ka jaka pynlang ksai Ryndia kan long ka jingkyrkhu kaba khraw ïa ki nongthaiñ jaiñ ka Raid Nongtluh kiba lah ban pynbit pynbiang bad kyntiew ïa ka ïoh ka kot jong ka ïing ka sem lyngba kane ka kam.
U Bah Mayralborn haba ai jingkren ha kane ka sngi, u la pynpaw ïa ka jingsngewkmen shikatdei ban ïohi ba kane ka kam kala urlong bad sdang ban pawnam ym tang ha ka Jylla, hynrei ha pyrthei wat shaduh shabar ka Jylla ruh kumjuh bad ong ruh ba u ksai Ryndia u don beit ha syndah ka dohnud ka jong u.
U la pynpaw ruh ïa ka jingsngewsarong ba ka Sorkar kala ithuh kyrpang ïa kane ka kam thaiñ jaiñ da kaba pynlong ïa ka Umden Diwon kum kata ka Eri Silk Village bad pynïoh ruh ïa ka GI Tag ba ki nongthaiñ ki lah ban long trai halor kitei ki jaiñ Ryndia kiba ki la pynmih bad pyntip ruh shen kane ka thaiñ kan sa ïoh ruh ïa ka Craft Village, ka projek thymmai kaban ai jingmyntoi ym tang ïa ki nongthaiñ jaiñ, hynrei wat ïa ki nongri khñiang Ryndia ruh kumjuh.
