Shillong, Jymmang 01
Ka Employability Accelerator Programme, kaba dei ka jingïatreilang hapdeng ka UNIQLO India Private Limited bad Avenues Meghalaya, kaba thmu ban pynheh ïa ki lad ai kam ai jam bad ban pynkhlaiñ ïa ka jingpynkhreh ïohkam jong ki samla, ka la pynkut ïa ki batch ba nyngkong da ka jingïalang kaba ai syrnot (certification) kaba la long ha Shillong.
Palat 160 ngut ki nongïashim bynta, kynthup ïa ki samla pule kolej bad ki bym pat ïoh kam, kiba mih na ka thaiñ North East, ki la ïoh ïa ki syrnot hadien ba ki la pyndep ïa ka ‘training’ kaba 80 kynta kaba ïadei bad ka jingpynkhreh sha ka jingïohkam ïohjam, kaba la bei pisa pura da ka UNIQLO.
Ka jingïalang, kaba la long ha Courtyard by Marriott Shillong, ka la wanrah lang ïa ki heh na UNIQLO India, ki jaka pule, bad Avenues kum ka Training, Knowledge bad Curriculum Patner, kaba pyni ïa ka jingïatreilang kaba dang kiew hapdeng ka industry (ba ai kam ai jam) bad ka liang pule puthi.
U Kongsan ha kane ka sngi, u Bah Wailadmiki Shylla, Myntri ka Sports & Youth Affairs bad Health & Family Welfare, u la ong ba ha kane ka juk, ym donkam tang ïa ka sap, hynrei ka donkam ruh ka jingstad pura, ka jing long adkar bad ka jingïai bteng ban pule.
U la kdew ruh ba ki ri kum ka Japan ki kiew shaphrang namar ka rukom trei kaba bha, ka jingbiang por ban trei bad ka jingaiti lut ha ka kam.
U Manas Chaudhuri nongïoh khusnam Padma Shri, uba long u Symbud Kongsan, u la pynpaw ïa kajuh ka jingmut, da kaba ong ba ki samla ki dei ban nang ban shim nuksa na ri Japan.
U Kenji Inoue, COO & CFO ka UNIQLO India, u la ong ba ka company ka ngeit ba ka kam khaïi kamai kam dei tang ban die mar hynrei ruh ban noh synñiang sha ka imlang sahlang.
U Kaneko Yuichiro, COO, u la batai ba ka thong ka long ban kiew lang bad ki shnong ki thaw, ym tang ban pynheh ïa ka business hynrei ruh ban thaw ïa ki briew kiba lah ban jop ha kano-kano ka jaka.
U Raj Kharmih na Avenues u la ong ba kane ka prokram ka la wanrah ïa ka jingkylla ha ka rukom jingïakren bad jingïadei jong ki nongïashim bynta.
Ka jingïalang ka la pyni ruh ïa ka kolshor kaba riewspah jong ka thaiñ da ki jingïashad bad jingïarwai paidbah.
Ka prokram ka la kynthup ïa ki Jylla bapher-bapher kum Mizoram, Manipur, Meghalaya, Arunachal Pradesh, Nagaland, Tripura bad Assam, bad ki kolej kum Women’s College, Shillong; MIT University Shillong; Lady Keane College; St. Edmund’s College; bad Shillong College.
