Shillong, Jymmang 01
Hadien ba ka Hynñiewtrep Integrated Territorial Organization (HITO) East Khasi Hills, ka la ïoh jingtip ba la don ka kali trok kaba hiar sha ki bynta ka Sohryngkham kaba kit ïa ki bar jylla ka la leit mar-mar ban beh thong bad ka la bat ha lad Mawryngkneng, ha kaba ki la lap ba ki bun ki bar jylla kim don ïa ki kot ki sla kiba biang kum ka Labour License bad Police Verification.
Kumta ka HITO ka lah beh noh ïa ki sha Assam.
Hadien kane ki dkhot ka HITO ki la kiew sha kitei ki thaiñ bad leit khynra ha ki jaka bapher-bapher, ha kaba la lap ba la don u bar jylla u ba trei ha FCI Sohryngkham u bym biang kita ki kot ki sla.
Ka HITO ka la pynpaw ka jingsngew lyngngoh ba u tei u bar jylla uba trei, u dei tang u nongñiew khaw, kaba ka kam kaba u Khasi u lah ban trei, hynrei la ai pynban sha ki bar jylla.
Ka seng ka la kdew ruh ba ka kam daju kam kit sha u Khasi, katba ka kam suk kaba shu ñiew kaba ka kynthei Khasi ka lah ban trei ruh la ai sha u bar jylla.
Ka HITO ka la kyrpad ïa ki kontraktor baroh ba kin wanrah da ki Khasi ban trei khnang ba kan lah ban wanrah ka jingmyntoi. Da kaba maham tyngeh ruh ïa ki kontraktor ba kim dei ban ai trei ïa ki bar jylla bad lada ki lap kin sa shim ka sienjam kaba tyngeh.
Ka HITO ka dawa ruh ba ka FCI kadei ban wengnoh mardor ïa ki bar jylla kiba trei ha katei ka jaka ki bym biang ki kot ki sla bad kawei ruh ba ki dei ban ai kam sha ki Khasi kiba danglah ban trei.
