Shillong, Jymmang 01
Da kaba khot ïa ka jingai khublei jong ki nonghikai ïa ka Sorkar kum ka jingsngewhun bad sngewnguh kaba khraw tam, u Myntri Rangbah ka Jylla u Conrad K Sangma ha ka sngi Thohdieng jong ka taïew, u la ong ba ïa ka rukom siew bainong ba la buh ryntih na ka bynta ki nonghikai SSA bad ki 4th teacher, yn bishar ym da ka jinglut jingsep jong ka, hynrei da ki jingpynkylla kiba ngi la pynkylla.
U Conrad u la kren ha ka jingïalang pynkup burom ba la pynlong da ka Meghalaya SSA Schools Association (MSSASA) bad ka Meghalaya 4th Teachers Association ha madan Students, Jaiaw, ka jingïalang ai khublei ïa ka rai jong ka Sorkar Jylla ban pyntreikam ïa ka rukom siew na ka bynta ban pynbha ïa ka jingshakri ki nonghikai.
U Conrad Sangma u la pynpaw ïa ka jingsngewnguh ïa ka jingïalang kaba heh jong ki nonghikai mynta ka sngi.
“Nga dei ban shim ïa kane ka kabu ban pynpaw shisha ïa ka jingsngewnguh kaba khraw ïa phi baroh, kham duna bha ba kan jia ïa ki politishan, khamtam ba ngi ïoh ka burom bad ngi shah ai khublei na ka bynta kano-kano ka kam kaba ngi leh”, u la ong.
“Hynrei kum ki Khristan ngi ngeit beit ba ka jingleh sbun bad ka jingsngewnguh ka dei kaei-kaei kaba dei ban long shi bynta kum ki briew bad nga sngewkmen haduh katta-katta ba mynta ka sngi ka Meghalaya SSA School Association bad kumjuh ruh ka 4th Teachers Association da ki hajar ki la poi, nga la lyngngoh ban ïohi ïa ka jingbun ki nonghikai hangne ha ka jingïalang” u la ong.
“Na ka liang ka Kynhun Myntri baroh, ngi ai khublei ïa phi kiba la pynlong ïa kane ka prokram kaba ïaid beit ïaid ryntih ban ai khublei ïa ka Sorkar,” u la bynrap.
U la ong ba na ka bynta jong u shimet, kane ka lah ban dei kawei na ki sngi kaba pynhun hapdeng kine kiba bun ki snem ba la dep, ban trei na ka bynta ki paidbah bad shakri ïa ki paidbah ka Jylla.
Haba pynkynmaw ïa ka rai jong ka Kynhun Myntri, u Conrad Sangma u la kdew ïa ka jingeh ha ka liang ka pisa tyngka.
U la ong ba ka Sorkar Jylla kan pynlut palat T.800 klur man la u snem na ka bynta ban pyntreikam ïa ka rukom siew tulop kaba thymmai sha ki nonghikai.
“Ïa kane ka jingktah ha ka liang ka pisa tyngka, ym lah ban bishar katkum ka pisa kaba ngi la pynlut. Lah ban bishar tang katkum kiba ngi la pynkylla dur ïa ka kam, lah ban bishar tang kumno ngin rah ïa ka Jylla Meghalaya kham shakhmat,” u la ong.
“Lada phi peit ïa ka pisa bad pyrshang ban kheiñ dor ne buh ïa ka jinglut ha ka, nga tharai ngi la duh ïa ka dur bad ngi la duh ïa ka jingmut, ngi la duh ïa ka jingthmu bad ka thong”, u la bynrap.
U Myntri Rangbah u la pynpaw ka jingsngewkmen ba u la lah ban pynurlong na ka bynta ka Jylla kaba long shi bynta jong kane ka jingïaid lynti naduh u snem 2016, ha kaba la lah shisha ban leh ïa kano-kano ka kam ban pynthikna ba ïa ka jingshakri ki nonghikai kan ïaid beit ïaid ryntih.
U Conrad Sangma u la ai khublei ïa baroh kiba la wan ha kane ka jingïalang kaba la long ruh ka prokram kaba jop.
“Nga ai khublei ruh ïa ka tnad pule puthi namar kane kan ym long kaba lah khlem ka jingtrei shitom ba la leh da u Myntri ba dei peit ïa ka pule puthi,” u la ong.
“Hynrei ka dei ka mon, ka dei ka rai bad ka jingkwah ban wad ïa ka lad bad ka jingaiti, ka jinglong beit ban bteng wat hapdeng ki jingeh baroh, ka la pynlong ïa kane ka sngi ban long ka sngi kaba jop”, u la bynrap biang.
U la ai khublei ruh ïa ki kynhun nonghikai, ki President, ki Secretary, ki dkhot, ba kaei kaba ka Sorkar ka la lah ban pynurlong ïa ki jingdawa, ka donkam shibun eh ba kin don ïa ka jingshaniah.
“Nga ai khublei ïa ki nongthoh ïa ka polisi pule puthi ha u snem 2019, bad kito kiba la thaw ïa ka jingmut ba shisha bad ka ‘road map’ ba kumno ka pule puthi ka dei ban ïaid shakhmat. Nga ai khublei ïa ki dkhot jong ka Education Commission ruh kumjuh”, u la ong.
Haba pynkut ïa ka jingkren, u Myntri Rangbah u la kyntu ïa ka rukom treikam kaba pynshong nongrim ha ki samla pule.
“Nga ngeit ba lada baroh ki nonghikai bad ki kmie ki kpa, ki heh bad ki riewsaiñ pyrthei, lada ngi sdang ban buh nyngkong ïa u khynnah ha baroh ki rai kiba ngi shim, tang kumta ka jingpule kan sdang ban pynkylla dur ha ka Jylla,” u la ong.
U la pynpaw biang ïa ka pule puthi kum ka jingthmu ba kongsan jong ka Sorkar Jylla.
“Ngi angnud ban ïohi ïa ka Meghalaya kum kawei na ki shiphew tylli ki Jylla ba ha khlieh duh ha ka ri. Kata ka jingangnud kan nym lah ban urlong lada ym buh ïa ka pule puthi kum ka jingthmu ba hakhmat eh jong ngi,” ong u Conrad Sangma.
Ha kane ka sngi la don lang ruh u Symbud Myntri Rangbah ka Jylla u Bah Prestone Tynsong, u Myntri ka tnad pule puthi u Bah Lahkmen Rymbui, u Commissioner & Secretary in-charge Education u Vijay Mantri nalor kiwei ki riew pawkhmat.
