Shillong, Jymmang 01
Ka Ïingbishar jong ka Additional Deputy Commissioner (Judicial) mynta ka sngi ka la kyntait ïa ka jamin ba la pan ïa kiwei pat ki nongshah kynnoh ha ka mukotduma pynïap ïa u Raja Raghuvanshi.
U nongïasaid aiñ jong ki nongshah kynnoh, u Y. Yobin u la ong ba namarba ka don ka jingbakla la kyntait ïa ka jamin.
“Ngi lah ban wan biang sha ka Ïingbishar ha kawei pat ka por ynda la buh tarik biang,” u la ong.
Kiwei pat kiba la shah kynnoh ki kynthup ïa u Raj Kushwaha uba la shah kynnoh ba u dei u samla jong ka Sonam bad lai ngut kiwei pat kiba kynthup ïa u Vishal Singh Chauhan, u Akash Rajput bad u Anand Kurmi.
Kumban shu pynkynmaw ba ha ka 27 tarik Ïaïong, ka kashari jong u Additional Deputy Commissioner (Judicial) Dr. Kharbteng ka la ai jamin ïa ka Sonam Raghuvanshi kaba dei ka nongshah kynnoh ba hakhmat duh ha ka jingpynïap ïa u kurim jong ka, hadien ba ka la rai ba ki pulit kim shym la lah ban pyntip bha ïa ki nongrim ba la pynlong ïa ka ban kem ïa ka.
Ka Ïingbishar ka la pynpaw ha ka hukum jong ka ba ka jingbym bud ryntih ïa ka rukom treikam ka la pynkheiñ ïa ka jingïada jong ka Riti Synshar katkum ka kyndon 22(1) bad ka la pynthut ïa ka jingïada jong ka nongshah kynnoh.
