Shillong, Jymmang 01
Da ka jingsngewkhia haba ïadei ka jingjia ba lap metïap jong kawei ka samla Khasi ba leit sah trei bylla ha ka Jylla Karnataka, u Bah Edmund Khongngai ha ka sngi Thohdieng u la leit ban kyntu ïa u Superintendent of Police ka East Khasi Hills District ban shimkhia bad ban buddien ïa kane ka jingjia.
Haba ïakren sha ki nongthoh khubor u Bah Edmund u la ong ba ka daw ka jingleit jong u ban phah shimkhia ïa kane ka kam sha u SP Bah Vivek Syiem IPS, ka dei namar ba ka samla Agatha Khongwet ka dei shnong trai na Tangmang kaba hap hapoh ka Pynursla C&RD Block.
Shuh-shuh u la ong, kumba ka long mynta kane ka jingjia, ym pat lah ban tip thikna la ka dei ka jingjia ba ka Agatha ka pynïap hi lane don ba pynïap ïa ka, namarkata u la kyntu ïa ka tnad pulit jong ka Jylla ban shimkhia bad ba ka Agatha kan ïoh ïa ka jingbishar kaba hok.
U la ïathuh ba u la ïoh ban ïakren lyngba ka phone ïa ki nongïalam ka KSU Bangalore, kaba u la ïoh jingtip ba kane ka samla ka sahlang bad uwei u briew uba dei na Manipur.
U Bah Edmund u la pynpaw ba na ka liang u SP u la kular ban shimkhia bad ban buddien haba ïadei kane ka jingjia, ha kajuh ka por u la kyntu ïa ki samla ka thaiñ Riwar bad jong ka Ri Khasi, kiba don ha ka nongbah Bangalore ba ki dei ban long kiba husiar bad ba kin ri la ka burom ka akor haba ki leit ban trei ban ktah shabar jong ka Jylla.
Kum ban shu kdew la lap ïa ka metïap jong ka samla Agatha ha ka 29 tarik u Ïaïong 2026 ha ka por 7 baje tam eiei ka por janmiet ha ka ïingsah wai jong ka ha Hebbal, Bangalore.
