Shillong, Jymmang 01
U Lat ka Jylla Meghalaya u CH Vijayashankar ha ka sngi Thohdieng, u la ot ribon ïa ka State Campaign for Self-Enumeration jong ka Jylla hapoh ka Census of India 2027 ha Lok Bhavan, kaba pyni ïa ka sienjam ka Jylla ban pynlong ïa ka ri India kaba la leh nyngkong ïa ka Digital Census.
U Vijayashankar u la pyllait ruh ïa ka rukom ban pyntreikam ïa ka Self-Enumeration ha ka Self-Enumeration Portal, kum ka jingsdang bad ka nuksa ïa ki nongshong ha kylleng jong ka Jylla.
Haba kren ha ka jingïalang, u Lat u la pynpaw ïa ka jingkongsan, ka jingtreikam kaba khuid ba suba bad kaba ryntih jong ka Digital Self-Enumeration bad kyntu ïa ki nongshong shnong ba kin ïa shimbynta ha kane ka sienjam.
U la kitbok ïa ka ophis jong ka Directorate of Census Operations, Meghalaya bad pynpaw ba u don ïa ka jingngeit kaba skhem ba kan lah ban pynlong ïa kane ka jinglum ïa ka Khana Samari (Census ) ka ban long kaba thikna bad ka rukom leh kaba paka ha ka rukom kaba dei.
Ban leh ïa ka Self-Enumeration na ka bynta ki nongshong shnong kan sdang naduh ka 1 tarik haduh ka 15 tarik u Jymmang 2026. Kane ka rynsan ‘Online’ kan ailad ïa ki riewshimet ba kin pyndap ïa ki jingtip kiba bniah na ka bynta ka longïing longsem ka jong ki bad hadien yn sa wan ban pynshisha pat da ka jingleit rung ha man la ki thliew ïing.
Ki ophisar kiba la don ha ka jingïalang, ki la pynpaw ba kane ka sienjam ka dei ka bynta kaba kongsan jong ka Khana Samari 2027 (Census) bad ka pyni ruh ba ka Sorkar ka ïengskhem ha ka ban pyndonkam ïa ki kor teknoloji ban pynbha ïa ka rukom ai jingshakri ïa ki paidbah bad ban thaw ruh ïa ki polisi treikam kiba ïaid katkum ka jingshisha.
Ki la pynshlur ruh ïa ki nongshong shnong ba kin pyndep ïa ka Self-Enumeration ha ka por kaba la buh ban pynthikna ba ka jinglum ïa ki jingtip kan long kaba shisha bad kaba thikna.
Ha kane ka jingplie ïa ka State Campaign for Self-Enumeration jong ka Jylla la ïadonlang ka Dr. Pooja Pandey, Commissioner & Secretary ka Sorkar Meghalaya bad ka State Nodal Officer jong ka Census, u Biswajit Pegu u Director of Census Operations ka Sorkar India ryngkat bad ki heh ophisar jong ka Directorate of Census Operations, Meghalaya bad ki heh ophisar na ka Sorkar Jylla.
