Nongpoh, Jymmang 01
Ki doktor ka Civil Hospital Nongpoh ki dang bteng ban ai ïa ka jingsumar kaba paka sha i khyllung iba la shah tep im mar syn dep kha ha kawei ka shnong kaba hap ha Ri-Bhoi District, la ong ka tyllong khubor ba la ïoh lum katba ka kmie jong itei i khyllung kaba la shah sumar lang ha katei kajuh ka hospital, ka la ïoh bor bad la kham jem.
Kumban shu kdew, ha ka 27 tarik jong u bnai Ïaïong, ki khynnah skul lem bad ki paidbah, ki la ïoh ban pyllait im ïa i bad kane ka jingjia ka la paw pyrthei ha ka 30 tarik jong u bnai Ïaïong lyngba kawei ka dur-khih kaba la saphriang lyngba ka ‘WhatsApp’.
Hadien ka jingsaphriang ïa katei ka dur-khih, ki bor pulit ka Ri-Bhoi ki la pynmih syndon da ka jingmaham ban mana ïa kino-kino ki ‘riew paidbah ba kim dei ban pynsaphriang ïa ka dur-khih lane ka dur jong itei i khyllung kaba lah ban pyn-ithuh ïa i, naba kane ka long ka kam be-aiñ bad kiba leh pyrshah kin ngat ha ka jingpynshitom hapoh ki kyndon jong ka aiñ Juvenile Justice (Care and Protection of Children) Act 2015.
Ki pulit ki la ïathuh ruh ba halor katei ka jingjia, la pynngat mukotduma ha Nongpoh Women Police Station katkum ka Case No. 22(04)2026 bad ka jingtohkit halor katei ka kam ka dang ïaid shakhmat.
Shuh shuh, na ka liang jong ki pulit ka Ri-Bhoi, ki la ai ruh ka jingïaroh bad ka jingsngewnguh sha ki khynnah skul bad ki paidbah kiba la don bynta ban pyllait im ïa itei i khyllung.
