Shillong, Jymmang 01
Ha ka jingpynbna ha ka sngi rakhe ïa ka ‘May Day’ na ka bynta ki nongtrei ‘Muster Roll’, u Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Sorkar Jylla ka la mynjur ïa ka jingdawa kaba la slem bah jong ki na ka bynta ka Variable Dearness Allowance (VDA), kaba kynthup ruh sa ïa ka jingpynlut kaba T.10 klur ha ka shi snem.
Haba kren ha ka prokram ‘International Workers’ Day’ ba la pynlong da ka ophis jong u Labour Commissioner bad ka Meghalaya Building & Other Construction Workers Welfare Board, u Conrad u la ong ba ïa kane ka ‘file’ la dep ban mynjur ha ka Sngi Palei da kaba buh hakhmat ïa ka jinglong kongsan jong ka 1 tarik u Jymmang.
“Nga sngewkmen ban pyntip sha phi ba dang hynnin ka sngi, ka Sorkar da kaba buh jingmut ïa ka jingkongsan jong kane ka sngi, ka la mynjur ïa ka ‘file’ bad ngi la mynjur ïa ka VDA kaba thymmai na ka bynta ki nongtrei ‘Muster Roll’ khnang ba ki nongtrei ‘Muster Roll’ jong ngi ki lah ban ïoh ïa ki jingmyntoi kiba donkam kiba ki dei hok ban ïoh,” la ong u Myntri Rangbah ka Jylla.
Haba kubur ïa ka jingktah ha ka liang ka pisa-tyngka, u Conrad u la ong ba ïa kane ka rai la pynlong da kaba pyrkhat ïa ka imlang-sahlang.
“Kane kan lut shuh sa T.10 klur ha ka shi snem. Hynrei ngi ngeit ba kane ka pisa kaba T.10 klur kaba la pynlut palat ïa kaei kaba la dep pynlut ka long na ka bynta ka jingmyntoi jong ka bynta kaba kham heh jong ka imlang-sahlang, bad ka bynta kaba kham duna ha ka ïoh ka kot jong ka imlang-sahlang,” u la ong.
“Kumta ka long kaei-kaei kum ka Sorkar kaba buh jingmut ïa ka bynta jong ka imlang-sahlang – ka dei kaei-kaei kaba ngi hap ban leh,” u la bynrap.
U Myntri Rangbah u la kdew ba ka jingmynjur ïa ka VDA kan kynthup ïa ka kynhun kaba ïar jong ki nongtrei.
“Namarkata, ngi la shim ïa kane ka rai kaba kongsan bad nga sngewkmen ba kane kan ai jingmyntoi ïa ki hajar, bad ki hajar ngut ki nongtrei ‘Muster Roll’ jong ngi bad ki nongtrei bapher-bapher kiba trei ha ki tnad treikam bapher-bapher,” ong u Conrad.
