Nongpoh, Jymmang 01
Ka ophis treikam jong u Sub-Divisional Officer (SDO) ka Patharkhmah Civil Sub-Division ha ryngkat ka jingïatreilang bad ka ophis u Deputy Commissioner ka Ri-Bhoi District lem bad ka Meghalaya Basin Management Agency (MBMA) ha ka Sngi Thohdieng ka la pyllait paidbah ïa ka prokram ‘Green Force’ Patharkhmah (GFP) kum shi bynta ban wanrah ïa ka jingïatreilang kaba ïajan hapdeng ki paidbah jong ki shnong ka thaiñ na ka bynta ban pynneh-pynsah ïa ka mei mariang sawdong sawkun bad ruh ban pynlong ïa ki shnong ki thaw kiba khuid ba suba.
Ïa kane ka prokram GFP kaba la pynlong ha Patharkhmah Community Hall, la wan ban pyllait paidbah da u Bah Sosthenes Sohtun, Myntri Sorkar ka Jylla ba dei khmih ïa ka tnad C&RD, GAD bad SAD. La sakhi ruh ha kane ka sngi da ka jingïadon ryngkat u SDO ka Patharkhmah, u Chaitanya Awasthi, u Bah Petalman Thangkhiew, Rangbah Shnong ka Patharkhmah nalor kiwei de ki ‘riewpawkhmat ka thaiñ bad ki nongïalam jong ki shnong bad seng samla.
Ka jingthmu ba kongsan jong kane ka prokram ka long ban pynïajan ïa ka jingtreilang jong ki shnong ki thaw ka thaiñ lyngba ka ‘Inter Village Development Championship’ na ka bynta ban wanrah ïa ka imlang ka sahlang kaba khuid kaba suba, ban pynkhie im bad pynjyrngam biang ïa ka mei mariang, ban pynlong ïa ki wah kiba khuid bad kiba don jingim na ka bynta ki dohkha dohpnat bad ban kiar na ka jingbret pathar ïa ki jaboh jabaiñ ha ki shnong ki thaw bad ka imlang ka sahlang hi baroh kawei.
Haba ai jingkren ha kane ka sngi, u Bah Sosthenes Sohtun u la ong ba ka jingwanrah ïa ka khuid ka suba, ka jingpynneh ïa ki dieng ki siej bad ki lum kiba jyrngam bad ruh ïa ki wah kiba khuid ba suba, ka dei ka bynta kaba baroh ki hap ban don lang ïa ka jingkitkhlieh, kata naduh u nongmihkhmat, ki ophisar bad ruh ki paidbah nongshong shnong.
U la ong ruh, “Kan myntoi aïu ba ngin ïoh ïa ka spah pyrthei, hynrei ngin duh noh ïa ka jingkhuid ka jingsuba, ngin duh noh ïa ka lyer kaba khuid ban ring mynsiem bad kyntu ïa ki paidbah ba ka long kaba donkam haduh katta ba ngin hap ban pynneh-pynsah ïa ki lum ki wah bad ka mei mariang sawdong-sawkun kaba khuid kaba suba na ka bynta ka jingmyntoi jong ki khun ki kti hadien habud bad kan long ruh ka nuksa ïa ki ha ki por ki ban sa wan.”
U Bah Sosthenes Sohtun u la pynpaw ruh ïa ka jingsngewkmen ban ïohi ïa ka jingwan ïashim bynta da ki paidbah ha kane ka sngi ba kynthup naduh ki rangbah, ki longkmie bad ki samla ruh kumjuh kan long shi bynta kum ka jingkyrsiew thiah halor ka jingdonkam ban pynneh-pynsah ïa ki khlaw ki btap, ka mariang sawdong-sawkun bad ka imlang ka sahlang hi baroh kawei.
U la ong ruh ba kum u nongmihkhmat bad ka Sorkar Jylla, ki don ïa ka thong ban ïohi ba ki paidbah nongshong shnong ka thaiñ kin bha kin miat, kin shait kin khlaiñ bad kin lah ban kiew shaphrang ha baroh ki liang bad ban nang kyntiew shuh ïa ki jingdonkam bapher-bapher jong ki paidbah na ka bynta ban ïoh ïa ka lawei kaba phyrnai.
Kum shi bynta jong ka jingpyllait paidbah ïa kane ka sienjam, la sam ruh ïa ki tiar pynkhuid jaboh jabaiñ kum ki juti but (boots), ki jingsop kti (gloves) lem bad kiwei-kiwei, pynbud pat sa ka jingpynkhuid ïa ka madan ïalehkai jong ka Western Ri Bhoi Sports Association (WRBSA) nalor ki rud surok bad kiwei ki jaka ba marjan kaba la ïashim bynta lang ruh da u Myntri Sorkar, Bah Sosthenes Sohtun.
