Shillong, Jymmang 01
Ki nongkitkam bad ki nongkyrshan ka UDP na ki katto-katne ki konstitwensi kiba don ki MLA ka UDP ki dang pynkhreh ba kin sa rung sha ka seng NPP ha kine ki bnai, kawei ka konstitwensi, hadien kawei pat.
Ka jingpaw pyrthei ban mih noh ki nongkyrshan jong ka UDP na ki konstitwensi ba don ki MLA ka la sdang nyngkong na ka UDP-Mawkyrwat Circle kaba hap ha South West Khasi Hills District kaba la mihkhmat da u Bah Renikton Lyngdoh Tongkhar ki ban sa leit pynïasoh sha ka seng NPP lashai ka sngi, ka 2 tarik Jymmang 2026.
Katkum ki khubor kiba la ïoh lum, u Bah Renikton u dang phah shuwa ïa ki nongkyrshan ban mih noh na ka seng UDP bad hadien ba la jan kut ka samoi treikam un sa mih sa ïalade ban rung sha ka seng NPP.
Ki khubor kiba ïajan ki ïathuh ba ki don ki MLA ka UDP kiba la kwah ban mih noh na ka UDP hynrei ka aiñ kam shah ïa ki ban mih mynta.
Kumta ban lait na ka aiñ kyntiap seng, ki dang don ki MLA ka UDP ki ban sa phah ïa ki nongkyrshan ba kin dang leit rung sha ka seng NPP.
Katkum ka khubor ba la ïoh lum, la ïathuh ba ka jingthmu ban leit pynïasoh ki MLA ka UDP sha ka NPP namar ki kwah ba ki kam pynroi ha ki konstitwensi ba ki mihkhmat kin ïoh kham bun namar ka NPP ka dei ka seng kaba bun ngut ki MLA kaba la ïalam ïa ka Sorkar Jylla.
Sa kawei ka khubor ka ïathuh ba lada ki MLA ka UDP ki la ïoh bun ngut ka jingbunpaid, kin ym ap shuh haduh ban da dei ka por ilekshon ha u 2028, hynrei ki lah ban rung noh ha kano-kano ka por.
Katba ka UDP kaba don 12 ngut ki MLA ka ïoh tang 2 ngut ki Myntri ha ka Sorkar Jylla bad kane ka jingsdang orpait ka UDP ka dei naduh ba la shah weng Myntri, u Bah Paul Lyngdoh, u MLA na West Shillong bad Bah Kyrmen Shylla, u MLA na Khliehriat bad pynrung bujli da u Bah Metbah Lyngdoh uba dei na Mairang bad kum u President ka UDP bad u Bah Lahkmen Rymbui u MLA na Amlarem.
Ka UDP ka don 12 ngut ki MLA kaba kynthup ïa u Bah Metbah Lyngdoh kum u President, Bah Paul Lyngdoh kum u Working President, Bah Lahkmen Rymbui, Bah Kyrmen Shylla, Bah Renikton Lyngdoh, Bah Pius Marweiñ, Bah Balajied Synrem, Bah Olan Suiñ, Bah Nujorki Sungoh, Bah Mayralborn Syiem, Bah Matthew Beyondstar Kurbah bad Bah Synshar Lyngdoh Thabah.
