Nongstoiñ, Jymmang 01
Ha ka Sngi Thohdieng jong ka taïew, ka seng Federation of Khasi Jaiñtia and Garo People (FKJGP) Rambrai Circle, ka la leit ban jurip ïa ka jingkieng Mawthaw-Umbah kaba don ha Rambrai hadien ba ka seng ka la ïoh pdiang ïa ki jingujor halor ka jingpyntrei torti ïa katei ka jingkieng da ka kompani ‘Spica’, kaba pyntrei ïa ka surok Nongstoiñ-Rambrai.
Shuh shuh ha ka jingjurip jong ka seng FKJGP ha ka jingïalam u samla Fullmoon Marweiñ, General Secretary ka FKJGP Rambrai Circle ha ryngkat ki dkhot jong ka seng, ki la lap da la ki jong ki khmat ba katei ka jingkieng ka la orpait ha ki bynta ba shiliang jong ka kynroh kaba lah ruh ban ap jingma ïa ki paidbah nongleit nongwan.
U samla Fullmoon Marweiñ u la ong ba hadien ba la sakhi ïa ki dak or pait jong ka kynroh, ka Seng ka dawa na ka kompani ‘Spica’ ba kan pyntrei bha ïa katei ka jingkieng khnang ba ka surok bad ka jingkieng kin long kiba neh skhem bad ban shngaiñ ka ïaid ka ïeng ki paidbah.
Shuh shuh u la ong ba na ka liang jong ka Seng shen kan sa leit ruh ban ujor sha ki bor kiba halor haba ïadei bad katei ka bynta khnang ba kan ym don kano-kano ka jingjia kaba sngewsih ïa ki paidbah hadien habud.
