Shillong, Jymmang 01
U Myntri Rangbah ka Jylla u Conrad K Sangma ha ka janmiet jong ka sngi Thohdieng jong ka taïew, u la hiar bran-bran napoh ka kali, ban ïakren ïa ki nonghikai ka Meghalaya Vocational Teacher’s Union, kiba la ap hajan madan Student, ha ryngkat ki plakad, ban dawa na ka Sorkar ban kynthup lang ïa ki ha ka New Pay Structure jong ki nonghikai SSA bad kiwei.
U Conrad u la mih na ka jingïalang ba la pynlong da ki nonghikai SSA bad ki 4th teacher ban ai burom ïa ka Sorkar kaba la pynbna ïa ka jingsiew ba thymmai ba la pynlong ha madan Student bad hadien ba la poi ha surok ha jaka ba ïeng ïakhih ki nonghikai ka MVTU, u la hiar napoh kali ban ïakren bad ki.
U Conrad u la kylli na ki nonghikai ba jia aiu? Bad balei ki ïeng rah plakad ha surok, ha ryngkat ka jingïa khublei kti, ha kaba ki la pynsngew sha u Myntri Rangbah ïa kaei kaba ki la dawa bad kaba dang sahteng haduh mynta.
U Myntri Rangbah u la ïakren shiphang bad ki nongïalam ha katei ka jaka bad u la rah ruh ïa ki jingthoh jong ki nonghikai kiba ïadei bad ki mat jingdawa.
U Myntri u la kular ruh ban ong “Ngan sa pyntip ïaphi ki nongïalam ka kynhun halor kine ki mat jingdawa”.
Haba ïakren bad u Bah Aibansuk Suchiang, President, u la pynpaw ïa ka jingsngewkmen ba u Myntri Rangbah u la hiar hi dalade napoh ka kali ban ïakren bad ki.
U la ong ba na ka liang jong ki, ki la ïoh ban ai ki jingthoh ïa u Myntri Rangbah bad u la kular ba un sa pyntip ïa ki bad kin sa peit kaei kaba na ka liang jong u un leh halor kine ki jingdawa jong ki.
“Ngin ïai bteng beit ban dawa ïa ki mat jingdawa jong ngi haduh ba ka Sorkar kan sngap bad ai kumba ngi kwah,” la ong u Bah Aibansuk.
