Shillong, Jymmang 01
Ki nonghikai kiba hap hapoh ka shatri ka Meghalaya Vocational Teacher’s Union (MVTU) ha ka 01 tarik u Jymmang 2026, ki la ïaid ban leit tur kynsan-kynsan sha ka jingïalang jong u Myntri Rangbah ka Jylla, u Conrad Sangma da kaba rah ryngkat ki plakad.
Ka jingleit tur kynsan ki nonghikai ka dei halor ka jingdawa ba ka Sorkar ka la ai ïa ka jingsiew ba thymmai sha baroh ki nonghikai, katba ïa ki nonghikai ‘Vocational’ pat kam shym la kynthup lang.
Ha kane ka sngi la sakhi ba ki nonghikai ki don kumba 20 ngut eiei kiba la hiar naduh na Motphran ban leit tur kynsan sha ka jaka ba don jingïalang u Myntri Rangbah ka Jylla ha madan Student, Jaiaw.
Ki nonghikai ki la ong, ba kane ka jingrah plakad jong ki, ka long ban pyni sha ka Sorkar ba ki ruh ki donkam ban shah kynthup lang ha kane ka New Pay Structure kaba ki nonghikai kiba hap hapoh ka shatri ka Meghalaya SSA Schools Association bad ka Meghalaya 4th Teachers Association ki la pynlong jingïalang sngewnguh ïa ka Sorkar halor ka jingpynurlong jong ka ïa ki jingdawa jong ki, kaba la pynlong ha madan Student, Jaiaw.
“Ka jingsiew ïa ngi bad ka kam ba ngi trei kam ïahap ei-ei sha bneng sha khyndew ruh, na kata ka daw ngi wan ban dawa ïa kane na u Myntri Rangbah ha madan Student,” la ong ki nonghikai ‘Vocational’.
Ha ka por ba ki nonghikai ki thmu ban leit tur kynsan sha madan Student, ki la shah khang lynti noh ha ki bor pulit bad Magistrate ha Synod College, ban nym shah ba kin leit rah plakad sha madan Student ba dangïaid ka jingïalang.
“Ïa kiwei ki nonghikai ka Sorkar ka la ai ka jingsiew ba thymmai hynrei ïa ngi ki nonghikai ka ‘Vocational’ pat kim shym la pynrung lang bad i kumba ki leh klet haba ngi lah dep ban dawa naduh u snem 2019,” la ong ki nonghikai.
“Ngi shu wan ban rah plakad ban pyni ïa ka jingdawa sha u Myntri Rangbah ba ki nonghikai ka ‘Vocational’ ruh ki donkam ban pynrung lang ha kane ka thup jingsiew ba thymmai ka tulop namar ka jingtrei bad ka jingsiew kam ïadei eiei,” la bynrap biang ki nonghikai.
Kine ki nonghikai kidei kiba hikai ha ka klas 9 haduh ka klas 12.
