Shillong, Jymmang 01
Hadien ba ka Khasi Students’ Union (KSU) Mihngi Circle ka la leit ban ujor sha u Chairman ka Institute of Hotel Management (IHM) u Dr. Vijay Kumar halor ka jingbym biang ka rukom treikam ka Principal jong kane ka shlem pule, ha ka sngi Thohdieng na ka liang ka Director ka tnad Tourism ka Kong B. L Pahkynteiñ MCS, ka la khot ïakren ïa ki nongïalam ka KSU ban ïakren pynbeit haba ïadei kiba bun ki kynrum-kynram kiba don ha katei ka shlem pule.
Haba kren sha ki nongthoh khubor hadien ka jingïalang bad ka Director kumjuh ka Principal jong ka IHM, u samla Samuel Kharbani nongïalam ka KSU Shillong Mihngi Circle u la ïathuh ba ka tnad ka la kular ïa ka seng ban buh da ka ‘Grievance Cell’ lane ka tnad ban peit kyrpang ïa ki jingai jingmut, khnang ba ki khynnah pule ha IHM ki lah ban pynpaw ïa ki jinglap jingshem jong ki hapoh katei ka shlem pule.
Shuh-shuh u la ïathuh ba ki don ruh kiwei ki mat ba ka seng kam pat hun na kane ka jingïakynduh bad ka Director, kumta ki la ïa pynbeit ba ka seng kan sa ïakynduh ïa ka Principal jong ka IHM ha ka 5 tarik u Jymmang 2026 ban ïakren bad ban ïa pynbeit ïa ki kam, hynrei lada ka Principal kam lah ban pynshai haba ïadei ki mat jingdawa ka KSU, ka Director ka la kular ban buh da ka kynhun tohkit (Inquiry) haba ïadei bad kane.
Kum ban shu kdew ka KSU ha ka sngi ba la lah, ka la phah da ka jingthoh sha u Chairman jong ka IHM ban pynpaw ba kane ka shlem pule ka treikam khlem da bud ïa ki kyndon aiñ, nangta ka la dawa ba ki bor pynïaid katei ka shlem pule ki dei ban pynphai kloi ïa ka ‘Security Deposit’ bad ban sangeh ban lum ïa ki jingsiew kiba bunjait bad kiba bun kiwei de ki mat jingdawa.
