Shillong, Jymmang 03
Ki san ngut ki suba nong Bangladesh kiba la shah bat noh ha ki shipai Border Security Force (BSF) ki la kam kylla ba ki dei ki nongshong shnong ba pura jong ka Surat ha Jylla Gujarat.
Katkum ka khubor na ki pulit la ong ba ha ka 29 tarik jong u bnai ba la lah, ki shipai BSF kiba don ha BOP Pyrdiwah ki la bat noh ïa kawei ka kali kaba don ïa u registration number AS01-GG-4557 ha Dawki, West Jaiñtia Hills bad ban bat noh ïa ki san ngut ki briew ba la suba dei ki nong Bangladesh, kata ba kynthup ïa u Safigul Rahman Khan (26 snem), ka Hima Safiqul Khan (20 snem) bad lai ngut kiba dang rit rta ryngkat bad u nongñiah kali uba la tip kyrteng kum u Ramjan Hussain Barbhuia (47 snem) uba na Assam.
Hynrei kine ki briew kiba la shah bat, ki la kam ïalade ba ki dei ki nongshong shnong jong ka Surat ha Gujarat bad ong ba ki dei kiba la shah beh sha Bangladesh na khappud jong ka Sylhet ha u bnai Jymmang, 2025, bad ba ki la wan rung beaiñ mynta shapoh u pud u sam jong ka India, da ka jingthmu ban leit phai biang sha Surat, Gujarat.
Ha kawei pat ka khubor, ha ka 30 tarik jong u bnai ba la lah, ha ka por kumba 12.45 dang step, u Rangbah Shnong jong ka shnong Nongtyngur ha East Khasi Hills ha ryngkat bad ki nongshong shnong jong ka thaiñ, ki la leit ban aiti ïa uwei u nong Bangladesh uba la tip kyrteng kum u Md. Hussain (32 snem) ha thanad Pynursla.
La ong ba ha ka por jong ka jingtohkit, la lap ba une u nongrung beaiñ u dei uba la shah kthong ha ki BSF, hynrei ha kaba u la ïoh ban rung beaiñ shapoh u pud u sam jong ka India bad la ong ba u kam sha shiliang u pud da ka jingthmu ban leit sha Mumbai ha Maharashtra ban leit trei bad la u jong u Mama.
