Shillong, Jymmang 03
U Pastor DC Huia u la pyntip ba u Missionary na Wales kata u Rev. EH William uba shong basah ha Shangpung, West Jaiñtia Hills u la lah ban pynïoh alphabet ïa ki Biate ha u snem 1913.
U Pastor DC Huia u la pyntip ïa kane haba ai jingkren ha ka jingïalang jong ka 46th Biennial General Assembly jong ka jingrakhe dap shispah snem ka Presbyterian Church of India (PCI) kaba la pynkut ha ka sngi U Blei ha madan JN Stadium, Polo.
U la ong ba ka PCI ka ñiewkor ïa ki missionary kiba la wan ïalap ïa ka ktien jong U Blei kumta u ainguh ïa U Blei namar ka Balang Presbyterian haduh mynta ka kyrshan hi dalade ban synshar ruh dalade.
Kane ka General Assembly ka Presbyterian Church of India ka la ïoh ban pynkut noh ïa ka jingrakhe dap shispah snem ha ka sngi U Blei ha madan Jawaharlal Nehru Stadium, Shillong ha kaba palat phew hajar ngut ki riewngeit na kylleng ki Synod na rilum Khasi bad Jaiñtia bad na kiwei ki jylla jong ka thaiñ shatei lam-mihngi ki la wan shakri lang.
Kane ka jingïaseng la pdiang da ka Balang Presbyterian Phudmuri kaba hap ha Khasi Jaiñtia Presbyterian Synod Sepngi kaba la sdang naduh ka 28 tarik u Ïaïong bad kut ha ka sngi U Blei.
Ha kane ka jingïakynduhlang baroh ki khadsaw tylli ki Synod hapoh ka PCI ki la ïoh ban rakhe kyrpang ruh ïa ka jingdap shispah snem jong ka Presbyterian Church of India naduh ba ki nongïalap na ri Wales ki la wan seng ïa kane ka Balang Presbyterian ha Sohra ha u snem 1841.
Haba phai ha ka sngi U Blei, la sdang ïa ka jingïaseng kaba nyngkong ha ka por 10:30 mynstep bad la sam ïa ka ktien jong U Blei da u Pastor LS Nongphlang bad la ai ki jingrwai saw sur kum ka Biateriam Synod Standing Choir, CHT Synod Standing Choir, KAPC Synod Standing Choir, Manipur Synod Standing Choir bad jingïaseng khynnah balang Phudmuri.
Ha ka jingïaseng kaba ar sien kaba dei ha ka por 1:30 mynsngi, la sam ïa ka ktien jong U Blei da u Pastor DC Huia bad la pynrhem ïa ka jingïaseng da ka jingrwai saw sur na ka KJP Synod Mihngi Standing Choir, Mizoram Synod Choir, KJP Synod Sepngi Choir bad Phudmuri Choir.
Haba ai jingkren, u Pastor DC Huia u la ong ba ka Presbyterian Church of India ka ñiew burom ïa ki Missionary kiba la trei shitom ban pynlong ka jingïatylli bad ka jingngeit kaba skhem ban shakri ïa U Blei.
U la ong ruh ba ha kane ka jingrakhe dap shispah snem ka phang pdeng jong kane ka jingïaseng ka dei, “Ïu Blei long ka burom ha la ka rta”.
U la pynkynmaw ba ka Balang Presbyterian ka dei kaba ai sha ka kam U Blei ban pynïar ïa ka jingïalap ïa ka ktien jong U Blei sha kiwei pat ki jaidbynriew.
Ïa ka Balang Presbyterian ha ri India la seng ha u snem 1841 da ki mishoneri na ka Balang Presbyterian Wales da ka jingwan poi u Rev. Thomas Jones bad ka kurim jong u ki la poi ha Sohra bad na katei ka shnong, kane ka kam ka la saphriang shaduh Sylhet kaba la tip mynta kum ka Bangladesh, Cachar Plains, Assam, Mizoram, Manipur bad Tripura.
Ka Balang Presbyterian ha ri India katkum ka jingkheiñ ba ka jingdon ki dkhot haduh u snem 2025 ka la poi palat khadhynriew lak, san hajar, sawspah, ar phewlai ngut.
