Mawkyrwat, Jymmang 03
U Symbud Myntri Rangbah ka Jylla Bah Prestone Tynsong uba dei ruh u State President ka NPP u la ong, “Ka National People’s Party (NPP) kam don por ban leit sha surok kumba leh kiwei ki seng saiñpyrthei hynrei ka leit ban tied jingkhang sha Delhi, namar dei katei ka bor kaba khraw tam kaba lada ngi jah, ngi lah ban jah shiteng lynti bad lada ngi im ruh ngin im pateng la pateng.”
U Bah Prestone u la kren ïa kane ha ka jingïalang pdiang burom ïa ki nongkyrshan ka UDP, HSPDP, Congress bad VPP kiba la pynïasoh bad ka NPP ha ka 2 tarik u Jymmang, 2026 ha madan Nativity, Mawkyrwat.
U la ong ruh ba ka NPP ka dei ka seng kaba la saiñdur da u PA Sangma bad ka nongrim kaba hakhmat eh jong ka seng ka long ba ka ïeng ban ïada ïa ki rit paid, ki riewlum bad ki Khristan, kaba ka riti synshar jong kiwei ki seng saiñpyrthei ki ïapher.
U la ong ba dang ha ki khyndiat bnai ka la don ka jingïakren hapoh ka seng ba mynta ym dei shuh ban ïakren tang ïa ka jylla, “Hynrei kaei kaba ngi kwah ka long ban pyntylli ïa ki jylla jong ka thaiñ shatei lam-mihngi kum ka ‘One North Eastern State’ tang kawei ka sur napoh ki phra tylli ki jylla”.
“Ym pat don kiwei kiwei ki seng saiñpyrthei kiba pyrkhat ïa kane, la ki dei ki National Party ne ki Regional Party ban lum lang ïa kiwei pat ki seng saiñpyrthei hapoh Northeast ban ïa long kawei namar ka rukom pyrkhat pyrdaiñ, ka rukom im rukom man bad ka jingngeit ki ïa syriem,” ong u Bah Prestone bad bynrap ruh ba kiwei ki seng saiñpyrthei jong kiwei ki jylla hapoh Northeast ki kyrshan ïa kane bad donlang bad ka NPP namar ma ki ruh ki don ka juh ka jingthmu.
Haba ki missionary ki ïakynduh jingeh namar ba ka Sorkar India ka khang ban wan ïalap, dei u National President ka NPP uba shimkhia ban leit ïakren bad ka Ministry of External Affairs bad ka Ministry of Home Affairs ban shah ïa ki ban wan ïalap namar ym dei ba ki wan buhai shnong hynrei ki wan ban ïalap.
U Bah Prestone u la ïathuh ruh ba tang ha kine ki khyndiat bnai, ma u bad u Myntri Rangbah ki la leit sha Delhi ban ïakynduh ïa ka All India Catholic Association ban ïakren ba ki kwah ban pynkylla noh ïa ka aiñ Foreign Contribution Act kaba khang noh ïa ki jingïarap ki Balang Khristan kiba wan nabar Ri bad kane ka jingïakren ruh ka la long kaba seisoh.
Kumta u Bah Prestone u kyrpad ïa ki paidbah ka South West Khasi Hills ba ki dei ban pynshongnia bha bad kin ai ka jingïatreilang ban ïohi ïa ka roi ka par, ym ba kin shah ïalam bakla ha kiwei ki seng saiñpyrthei kiba sdang ban pynsngewthuh bakla da kumne da kumtai ïa u paidbah ha kine ki por.
