Shillong, Jymmang 03
U Samir Kant Jha u ba dei u Deputy General Manager jong ka State Bank of India ha Shillong u la ïathuh ba ka SBI ka don palat 23,000 tylli ki Branch ha ka ri bad 110 tylli ki Branch ha ka Jylla Meghalaya.
Ïa kane u la pyntip haba ai jingkren ha ka jingïalang plie ïa ka kor sei pisa (ATM) ba thymmai ha Lumkshaid, Lumkor ha ka janmiet jong ka sngi Saitjaiñ.
U Samir Kant Jha u la ong ba ka SBI ka dei ka Bank kaba heh tam ha ka Ri, da kaba pynpaw ba ka don palat 23,000 tylli ki shnat treikam (Branch) ha kylleng ka ri India.
“Ka SBI ka la buh palat 65,000 tylli ki ATM ha kylleng ka ri bad kaba kham sngewphylla ka long ba ka don haduh 52 klur ngut ki nongpynlang pisa kiba shaniah ha ka jingpynïaid ka SBI” la ong u Jha.
U la ïanujor ba lada ka SBI ka dei ka ri, ka la wan ha ka kyrdang kaba lai ka jingbun briew ha ka pyrthei bad u la pynpaw ruh ba ka SBI ka la don ruh ka shnad treikam kaba la ai jingshakri ïa ki nongpynlang pisa la palat 200 snem.
U Jha u la ong “Ka SBI ha kano-kano ka thaiñ ba ka don ïa ki shnat treikam, ka don ïa ka jingthmu ban ai ka jingshakri ba pura katkum ka jingdonkam jong ki briew ka thaiñ, khnang ban ïarap ban kyntiew ïa imlang sahlang.”
Haba kren haba ïadei ka ATM ba dang shu plie thymmai u la pynpaw ba dei tang ka SBI ATM kaba lah ban ai ka jingshakri ïa ki paidbah, ha kaba ki lah ban sei pisa khlem pyndonkam ïa ka ATM card (Cardless Transaction).
U Jha u la kyntu ïa ki nongshong shnong jong ka shnong Lumkshaid ba kin don ‘Bank Accounts’ ha ka SBI, da kaba kdew ba ki lah ban ïoh ki jingmyntoi kiba wan na ki skhim jong ka Sorkar Jylla bad ruh na ka Sorkar Pdeng.
