Shillong, Jymmang 03
Ha ka sngi Saitjaiñ jong ka taïew, u Myntri Rangbah ka Jylla, u Conrad K Sangma u la leit ban ïashim bynta ha ka prokram ba la pynlong da ka Dorbar Shnong, Madanrting kaba la long ha St.Peter’s Secondary School, Madanrting, Shillong.
Ha kane ka sngi la ïadonlang ruh u Co-Chairman, State Law Commission, Meghalaya, u Bah Lambor Malngiang, ka Kong Wansuk Syiem, ka MP barim ka Rajya Sabha, ki dkhot ka Dorbar Shnong Madanrting, ki nongshong shnong bad ki khynnah skul bad ki nonghikai jong katei ka skul.
Ha kane ka sngi u Myntri Rangbah ka Jylla u la pyllait paidbah ruh ïa ka kali kit nongpang (Ambulance) bad ïa ka kali kit metïap jong ka Dorbar Shnong.
Ha kane ka prokram la pynkupburom ïa ki samla pule kiba la pass bha, ki riewshlur ha ka por jong u Covid, ki nongtrei ASHA, ki nongjop ha ka jingïalehkai bapher bapher bad ki riew rangbah jong ka thaiñ ruh kumjuh.
U Myntri Rangbah ka Jylla, u Conrad K Sangma, haba ai jingkren ha kane ka jingïalang, u la ai ka jingïaroh ïa ka Dorbar Shnong kaba la pynlong ïa kane ka prokram bad kaba la ïoh ruh ban thied ïa ka kali kit nongpang bad ka kali kit metïap ban ai ka jingïarap na ka bynta ki nongshong shnong.
“Ka long kaba sngewkmen shibun ban ïohi ba ka Dorbar Shnong ka la pynbiang ïa kine ki jingdonkam kiba kongsan na ka bynta ka thaiñ ki ban pynsuk ban kit ïa kiba pang ne kiba mynsaw bad ka jingkit kaba shngaiñ bad kaba don burom ïa kiba la khlad noh,” u la ong.
U la bynrap ba ka long kaba kongsan ban pdiang bad pyni ïa ka jingsngewnguh da kaba bynrap, “Ka kam kaba ngi leh ne ki jingjop ha ka jingim jong ngi kam ju long kaba rit ne kaba heh than hynrei ka jingsngewnguh ka lah ban wanrah ïa ka jingkylla kaba khraw.”
Halor ki katto-katne ki jingeh ba la pynpaw da ka Dorbar Shnong ha ka jingthoh ba la ai ha u, u Myntri Rangbah ka Jylla u la kular ban pynbha, pynthymmai bad shna ïa ki jingdonkam ba kongsan na ka bynta ka madan ïalehkai Madanrting bad ka kynroh ban pynskhem ïa ka Locality Community Hall.
U la pynthikna ruh ban don ki light surok bad ki CCTV na ka bynta ka thaiñ ban long ka jingshngaiñ. U la bynrap shuh shuh ba yn sa bishar bniah ïa kiwei pat ki jingeh jong ka thaiñ.
U la ai ruh ïa ka jingïarap pisa kaba T.2 lak na ka jingïarap kyrpang jong u sha ki skul kiba ïashim bynta na ka bynta ki jingdonkam jong ki ha ka kolshor bad ka rwai ka siaw.
