Shillong, Jymmang 03
Ka HANM West Jaiñtia District kala shim ka rai ban leit tur lang sha Secretariat ban kyrshan ïa ka rai ka Dorbar Shnong Lapangap kaba la pynbeit ha ka 6 tarik mynta u bnai ban weng noh ki jingeh ki paradoh para snam kiba sah ha khappud Assam.
Kane ka rai ka dei kaba la shong jingïalang kyrkieh ha ka sngi Saitjaiñ hapoh ka jingïalam u President ka HANM West Jaiñtia Hills District Bah Thomas Sutlong ha jingïadonlang u President ka HANM Sengkmie Bah Lamphrang Kharbani.
Haba ai jingkren, u Bah Kharbani u la ong ba ka HANM West Jaiñtia bad ka East Jaiñtia ki la shim ïa ka rai ban leit kyrshan ïa ka shnong Lapangap ka ban leit tur sha Secretariat ha ka 6 tarik mynta u bnai Jymmang ban dawa ïa ka hok ka jong ki.
U la ong kane ka jingrai ka HANM ban leit synran ka dei namar ka rai jong ka shnong Lapangap ka long kaba shongnia namar ki la sngewsyier ban leit rep ha ki jaka lajong.
Kumta ka seng ka dawa na ka Sorkar ba ka dei ban sngap ïa ka jingeh jong ki paidbah ka shnong Lapangap namar kane ka jingshah thombor ïa ki nongrep ka long man ka por ha ka Jylla Assam.
