Shillong, Jymmang 03
Ka kam tuh kam thiem ka la nang bteng na kawei ka sngi sha kawei pat bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor kaba la ïoh na ki pulit la ong ba ha ka 29 tarik jong u bnai ba la lah, uwei u runar bym lah ban ithuh, u la ïoh ban prong tuh hapoh ka ïing ka jong u Ajit Singh kaba don ha Nongrimbah, Shillong bad ban tuh ïa ka ksiar kaba shongdor kumba T.50,000/- bad kawei ka mobile phone.
Ha kawei pat ka khubor, la ong ba ha ka 29 tarik jong u bnai ba la lah, ki runar bym lah ban ithuh, ki la ïoh ban prong tuh hapoh ka ïing ba la sah wai da u Aman Rang kaba don ha Umsohsun, Shillong bad ha kaba ki la tuh ïa kawei ka TV bad ka baje deng kti.
Katba na ka liang jong u Chiranjeet Das u la ai ka jingujor ba ha ka 28 tarik jong u bnai ba la lah, kata ha ka por kumba 2 baje mynsngi, ki runar bym lah ban ithuh ki la tuh ïa kawei ka tyndong lyer shet jingshet bad ka pisa kaba long T.4000 na ka jaka sah ka jong u, kaba don ha Lower Babupara, Tura ha West Garo Hills.
