Shillong, Jymmang 03
Ka Hynniewtrep Youth Council (HYC) Maweit Circle ka la leit ujor ha u SDO ka PWD Road West Khasi Hills District Nongstoiñ, halor ka jingkynnoh pyntrei torti ïa ki muri jong ka surok ba jrong 35 km na Maweit sha Kulang bad haduh Nongjri.
U samla Shemphang Tyrsa President HYC Maweit Circle ha ka kyrwoh khubor, u la ong ba ka katkum ka jinglap jong ka seng, ka jingpyntrei ïa kitei ka muri ka long kaba la shu trei torti bad ki khlem da shna bha ne ki khlem ai Cement (PCC) kaba long katkum ka Work Construction.
Ka rukom trei ka long kaba shu leh tang dep bad ka long be-aiñ ruh, namar kata ka seng ka kyntu ïa ka Ophis ban peit jurip ban peit bniah bad ban shna biang ïa kitei ki muri, namar ka jingbym shna bha bad ba khlem shna katkum ka jingpynmang.
Halor kane ka jingujor, ka ophis u SDO ka kular ban shimkhia ban phah shna biang ïa kitei ki muri kiba la shna.
Ka HYC ka la kren shai ba kan ym shong kli kti haba ïadei kane ka kam hynrei kan ïai bteng ban buddien bad ban hiar jurip ruh barabor ïa kitei ki muri ban pynlong ïa ka jingpeit bniah ïa ka jingpyntrei, ka la maham ruh ba ka jingjurip kan nym dei tang haba ïadei ka jingshna muri hynrei wat ïa ka jingpyntrei ba shilyntrei jong ka surok.
