Shillong, Jymmang 03
Ka kynhun jong ki Khlieh Nongshynshar bad ki Riew Rangbah jong ka Hima Sohra ka la khot la wer ïa ki khun ki hajar jong ka Hima ban ïa mih paidbah ha ka 7 tarik Jymmang 2026 ban leit tur sha ka ophis treikam jong ka Khasi Hills Autonomous District Council (KHADC) ban dawa ai Sanad noh ïa u Syiem ba ka Hima ka la jied.
Hadien ka jingkhlad noh u Syiem ka Hima Sohra u Pa’iem Freemansing Syiem, kata ha ka 31 u Risaw 2025, ka kur Syiem kaba dei hok ban pynmih ïa u Long Syiem, ka la sei da ka kyrteng jong u Pa’iem Maremdor Syiem u ba long u Syiem khynnah jong ka Hima, ba un long noh u Syiem Rangbah jong ka Hima.
Ha ka 1 tarik u Naiwieng 2025 ka Dorbar ki Myntri bad ki Bakhraw ka la mynjur ban phah ïa ka kyrteng jong u Pa’iem Maremdor Syiem sha ka Dorbar Hima, kaba long ha ka 3 tarik u Naiwieng 2025. Ha kaba la ong, da kawei ka sur ka Dorbar Hima ka la ai jingmynjur ïa ka kyrteng jong u Pa’iem Maremdor Syiem ba un shimti ïa ka khet ban long kum u Syiem Rangbah jong ka Hima Sohra.
Hadien ba ka Hima ka la dep ban mynjur bad pyndep ïa ka niam thang Syiem kumba la ju leh ha ki por hyndai, hynrei ka KHADC ka khlem ai Sanad pynban ïa u Pa’iem Maremdor Syiem, namar kata ka kynhun jong ki Khlieh Nongshynshar bad ki Riew Rangbah ha ryngkat ki khun ki hajar ka jong ka Hima Sohra ki la rai ban tur paidbah sha ka ophis jong ka KHADC ban pynbor ba ka dei ban ai Sanad bad ban ithuh noh ïa u Maremdor Syiem kum u Syiem ba pura jong ka Hima Sohra.
