Shillong, Jymmang 04
U Myntri Rangbah ka Jylla, u Conrad K. Sangma ha ka Lah Sngi U Blei u la ai khublei ïa ki khynnah pule kiba la seisoh ha ka eksamin Higher Secondary School Leaving Certificate (HSSLC) jong u snem 2026, da kaba ong ba ka risol ka long kaba “ai mynsiem ha baroh ki shnat pule.”
Haba buh ïa ka jingthoh ha ‘X’, u Myntri Rangbah ka Jylla u la ong “Ka jingai khublei ïa ki khynnah pule jong ngi! Ka jingai khublei kaba kmen shi kat dei eh sha baroh ki khynnah pule kiba la kynjoh ïa ka thong ha ka eksamin Higher Secondary School Leaving Certificate (HSSLC) 2026!”
U la bynrap, “Ka jingtrei shitom, ka jingkohnguh sneng, bad ka jingkut jingmut jong phi ka la pynlong ïa phi ban kynjoh ïa une u mawmer ba kongsan. Kane ka jingjop ka pynpaw ym tang ïa ki jingpyrshang ba minot jong phi, hynrei ka pynpaw ruh ïa ka jingkyrshan kaba ïaineh jong ki kmie ki kpa, ki nonghikai, bad ki shlem pule jong phi.”
Haba pynpaw ïa ka jingleh bha katkum ki shnat pule, u Conrad u la kdew, “Ka risol mynta u snem ka long kaba ai mynsiem ha baroh ki shnat pule: Arts: 88.63%, Science: 83.70%, Commerce: 87.49%, Vocational: 95.23%.”
U la pynkut da ka kyrwoh kitbok na ka bynta ki khynnah pule: “Nga kitbok-kitrwiang ïa kaba bha tam na ka bynta baroh ki khynnah pule haba ïadei bad ka lawei jong ki. Nang trei shitom, don ïa ka jingngeit kaba skhem, bad nang tur shaphrang!”
Ka Meghalaya Board of School Education (MBoSE) ka la pynbna ïa ka risol jong ka HSSLC-2026 ha ka Lah Sngi U Blei.
