Shillong, Jymmang 04
U Myntri Rangbah ka Jylla, u Conrad K. Sangma ha ka Lah Sngi U Blei u la ai khublei ïa u Myntri Rangbahduh ka ri, u Narendra Modi, u Myntri ka tnad kam pohïing ka Sorkar Pdeng, u Amit Shah bad u Myntri Rangbah ka Assam, u Himanta Biswa Sarma halor ka jingleh bha jong ka BJP ha ka ilekshon ha Assam bad West Bengal, da kaba ong ba ka dei ka “jingjop kaba khraw” bad ka jingpynpaw ïa ka jingshaniah jong ki paidbah.
Ha ki jingthoh ba u la thoh ha ‘X’, u Conrad u la ai khublei nyngkong eh ïa u Myntri Rangbahduh ka ri.
“Ka jingai khublei ïa u Myntri Rangbahduh badon burom, @narendramodi ji halor ka jingjop don burom jong ka seng jong u ha Assam bad West Bengal,” u la thoh.
“Kane ka rai paidbah kaba sawa jam bad ba sngewtynnad ka pynpaw ïa ka jingshaniah jong ki paidbah ha ka jingïalam ba ïohi jngai bad jingaiti jong u na ka bynta ka roi ka par, ka jingkiew shaphrang, bad ka synshar-khadar kaba bha,” u la thoh.
U la ai khublei ruh ïa u Myntri kam pohïing ka Sorkar Pdeng, u Amit Shah.
“Ka jingai khublei ïa u Myntri badon burom ka tnad kam pohïing ka Sorkar Pdeng, u Sh. @AmitShah ji bad ka seng jong u na ka bynta ban ïoh ïa ka jingkyrshan ba skhem jong ki paidbah jong ka jingaiti jong ki sha ka roi ka par ha Assam bad West Bengal,” la thoh u Conrad.
Haba phai pat sha u Myntri Rangbah ka Assam, u Himanta Biswa Sarma, u Myntri Rangbah ka Meghalaya u la ong, “Nga ai khublei ïa u hymmen jong nga, u Shri @himantabiswa na ka bynta ka jingleh bha jong ka seng jong u bad sa shisien ba u la ïoh ïa ka jingshaniah bad jingkyrshan na ki paidbah ka Assam.”
Kine ki jingthoh ki wan hadien ba ka BJP ka la ïoh ban thaw Sorkar biang ha Assam ha ka sien kaba 3 kumjuh ïa ka jingnang kiew jong ka ha West Bengal.
