Nongstoiñ, Jymmang 04
Ki nonghikai deficit jong ka skul St. Peter’s Higher Secondary School Pyndengrei kiba hap hapoh ka Khasi Jaiñtia Deficit School Teacher Association (KJDSTA) ha ka sngi Nyngkong, kila pynlong ïa ka ‘poster campaign’ hakhmat jong ka skul kum ka dak ban dawa na ka Sorkar ïa ka baibam (pension) ka jong ki nonghikai.
U Bah K Mukhim, uwei na ki nonghikai ha katei ka skul haba ïakren sha ki lad pathai khubor u la ong ba ïa kane ka poster campaign la leh lyngba ka Khasi Jaiñtia Deficit School Teacher Association (KJDSTA), ha manla ki deficit school bad u la ong ba ïa mynta ki dang leh tang ïa ka poster campaign khlem da pynthut ïa ki klas bad ïa ki khynnah bad lada jia ba ka Sorkar kam sngap kan sa poi ka por ba kin hap ban mih sha surok lyngba ki jingïakhih kiba heh bad kiba tyngeh.
Shuh shuh u la ong ba ha u snem 2023 kala don ka ‘draft’ na ka Sorkar na ka bynta ka plan ban ai pension ïa ki nonghikai deficit da kaba pan deposit ïa ki CPF kaba don ha ki account jong ki sha ka ‘centralized provident fund’ na ka bynta ban ai pension, pynban ha une u snem 2026 ki pynmih da ka ‘new centralized’ kaba ym sngew ïahap bad ym lah ban pdiang.
“Ngi dawa na ka Sorkar ba kan pynthikna bad pynkloi noh ïa ka pension skhim kaba kila plan ha u 2023 khnang ba, ïa ki nonghikai kiba la don naduh shwa u Ïaïong 2010 ngin ïoh da ka pension nangta kiba hadien u Ïaïong 2010 ruh ka NPS kan ïaid beit kumba la plan da ka Sorkar,” u la ong.
