Nongpoh, Jymmang 04
Ka long ka burom kaba khraw ïa ka Ri-Bhoi district hadien ba ar ngut ki samla pule ki la wan ha ka thup jong ka Top-10 ha ka risol Higher Secondary School Leaving Certificate (HSSLC) Arts Stream kaba la pynbna paidbah da ka Meghalaya Board of School Education (MBoSE) ha ka sngi Nyngkong.
Ki ar ngut ki samla na Ri Bhoi ki kynthup ïa ka Swastika Giri na ka skul Little Star Higher Secondary, Baridua kaba la wan ha ka kyrdan ba san da kaba ïoh haduh 440 marks lem bad u samla Starwell Ronghang na St. Paul’s Higher Secondary School, Nongpoh uba la wan ha ka kyrdan ba khyndai da kaba ïoh haduh 433 marks na ka thup kaba 10 jong kiba wan shakhmat eh.
Haba ïoh ban ïakren, ka Swastika Giri kala pynpaw ïa ka jingïaroh sha ki nonghikai bad nongpynïaid jong ka skul khamtam ïa ka Megha Sharma kaba dei ka counsellor halor ka jingshimkhia ka jong ki ban btin lynti bad len lade ban ai ïa ka jingïarap sha ki khynnah skul ha kano kano ka bynta kaba ki shem jingeh kat haduh ba kala lah ban poi sha kane ka thong.
Na ka liang u samla Starwell Ronghang pat haba ïoh ban ïakren, u la pynpaw ïa ka jingsngewkmen kaba khraw ba u la lah ban kynjoh sha kane ka thong bad ai ruh ïa ka jingïaroh sha U Blei, ki nonghikai lem bad ki bahaïing hasem kiba la kyrshan met bad mynsiem ïa u. Une u samla u la ong ba kam dei satia kaba suk ban poi ha kane ka kyrdan naba u hap ban mad shibun ki jingeh ha ka jingïaid lynti bad pynpaw ba dei lyngba ka jingtrei shitom bad minot thop ba u la lah ban poi ha kane ka kyrdan.
Halor ka jinglah jong kitei ki samla ban poi sha katei ka kyrdan, ka DN Sharma, Principal jong ka Little Star Higher Secondary School, Baridua lem bad ka Sister Anjelina CH Marak Principal jong ka St. Paul’s Higher Secondary School, Nongpoh, kila pynpaw ïa ka jingsngewkmen halor ka jinglah jong kitei ki samla ban wanrah nam bad burom ïa ka skul kaba ki mihkhmat bad ai ruh ka jingkyrkhu kyrdoh ba kin nangkiew shaphrang ha ka jingpule ki jong ki ha ki kyrdan ba kham shalor.
