Jop kput ka BJP ha Bengal & Assam, ka TVK ha Tamil Nadu

Shillong, Jymmang 04

Ka Bharatiya Janata Party (BJP) kaba long kawei na ki seng saiñpyrthei kaba radbah hapoh ka Ri, ka la ïoh ban thaw history da kaba ïoh ban thaw Sorkar ha ka sien kaba nyngkong eh ha West Bengal, da kaba knieh noh ïa ka bor synshar na ka Trinamool Congress.

Ha ka risol ilekshon MLA ba la pynbna ha ka sngi Nyngkong jong ki 5 tylli ki Jylla, ka BJP ka la jop kput ha West Bengal bad Assam, katba ha Kerala la jop da ka UDF kaba lamkhmat da ka Congress, ha Puducherry la jop da ka AINRC kaba ïatehlok bad ka BJP bad kaba la pynlyngngoh ngaiñ ka dei ha Tamil Nadu ha kaba ka seng saiñpyrthei kaba thymmai ka Tamilaga Vettri Kazhagam (TVK) kaba la thaw da u Thalapathy Vijay, uba dei u Actor ba paw uba la kylla ‘Politician’.

Haba phai sha ka Jylla Assam, haduh ba thoh ïa ka khubor, ka BJP bad ki paralok ba ïatreilang ka la jop haduh 102 tylli ki konstitwensi na ki 126 tylli ki konstitwensi, katba ka Congress bad ki paralok ba ïatreilang ka la jop tang ha ki 21 tylli ki konstitwensi. U Gaurav Gogoi uba dei u MP ka Lok Sabha bad ruh u President ka Congress ha Assam uba la paw kum uta u kyrtong Myntri Rangbah jong ka Assam u la shah rem noh ha u kyrtong ka BJP u Hitendranath Goswami da 23,182 vote na Jorhat Konstitwensi. 

Ka khubor kaba la pynkmen ïa ka BJP ka dei ka jingïoh ban khur ïa ka jingjop kaba heh bad ka nyngkong eh ha West Bengal, ha kaba ka la lah ban knieh noh syndon ïa ka bor synshar na ka TMC, kata hadien ba ka la ïoh bad jop haduh 208 tylli ki konstitwensi na ki 294 tylli, ka jingkheiñ kaba la ïoh tad haduh ba thoh ïa kane ka khubor.

Ka TMC hapoh ka jingïalam jong ka Mamata Banerjee ka la jop tang ha ki 79 tylli ki konstitwensi. Ka Mamata Banerjee kaba la bat kum ka Myntri Rangbah jong ka West Bengal haduh 15 snem, nalor ba ka la shah knieh ïa ka bor synshar, ka la shah rem ruh ha kane ka ilekshon, ha kaba u Suvendu Adhikari u la jop ïa ka jingïakhun da 15 hajar vote tam napoh ka Bhabanipur Konstitwensi.

Haba phai pat sha Tamil Nadu, ki ar tylli ki seng saiñpyrthei kiba la rim bad paw ha kane ka Jylla, kata ka DMK bad ka ADMK ki la mad ïa ka jingshah rem kaba heh hakhmat ka seng saiñpyrthei kaba thymmai ka TVK kaba la ïakhun ïa kane ka ilekshon ha ka sien kaba nyngkong eh. Ha kane ka jingïakhun, katkum ka jingkheiñ jong ki nongjop kaba la paw, ka TVK marwei ka la jop haduh 107 tylli ki konstitwensi na ki 234 tylli ki konstitwensi, katba ka DMK kaba la bat ïa ka bor synshar ha kine ki 5 snem, ka la jop tang 74 ngut bad ka ADMK ka la jop tang 52 ngut ki MLA.

Hangne ruh, ym tang ba ka DMK ka la rem kput hynrei wat u nongïalam jong ka, u MK Stalin uba dei u Myntri Rangbah ka Tamil Nadu ruh u la shah rem noh. Ïa u MK Stalin la pynliem noh da u VS Babu jong ka TVK napoh ka Kolathur Konstitwensi.

Haba phai pat sha Kerala, ka UDF kaba la lamkhmat da ka Congress bad ki paralok ba ïatreilang ka la ïoh ïa ka jingjop kaba heh, ha kaba ka la khur ka jingjop ha ki 101 tylli ki konstitwensi, ka jingkheiñ kaba lah ban kiew ne hiar naba haduh ba thoh ïa ka khubor ym pat lah ban ïoh kaba pura. Kumba ka paw ka Congress ka la jop ha ki 63 tylli ki konstitwensi, ka IUML ha ki 22 tylli ki konstitwensi lem bad kiwei ki paralok kiba la pynkot spah.

Katba ha ka Puducherry pat ka ka AINRC kaba ïatehlok bad ka BJP ki la jop 17 ngut ki MLA na ka 30 ngut.