Shillong, Jymmang 04
Ka Samla Meghashree Roy, kaba la wan ha ka kyrdan ba nyngkong ha ka risol Higher Secondary School Leaving Certificate (HSSLC), Arts Stream na St. Mary’s Higher Secon-dary School, ka la ong ba kam shym la poi pyrkhat ban poi ha kane ka thong.
Haba kren sha ki lad pathai khubor ha ka 04 tarik u Jymmang 2026, ka Samla Meghashree Roy ka la ïathuh ba ka eksam ka suk, namar ba ka la pynkhreh bha bad ka sngew ba ka eksam mynta u snem ka long kaba kham suk ha ka.
“Donkam bha ban pule ïa ki kot ba la ai ha skul, kata ka long kaba donkam eh,” ka la ong.
Kumta ka la ong ba ka don ïa ka thong ban ïakhun ïa ka eksam Civil Service.
“Nga da kyndit shisha bad sngew kmen ruh namar ngam ju khmih lynti ïalade ba ngan ïoh ïa ka kyrdan ba nyngkong, hynrei nga la kmen shisha” ong ka Meghashree Roy kaba ïoh haduh 457 mark ban ïoh ruh ïa ka kyrdan ba nyngkong.
Halor ki buit pynkhreh jong ka, ka Meghashree ka la ong ki ‘external reference book’ ne ki kot jingtip ba nabar ba lah ban khmih lang, kim long satia kiba donkam.
“Phim donkam ïa ki tyllong jingtip ba nabar lane kiwei ki kot. Ka shu long ba phi hap ban pule bha ïa ki kot ba la ai ha ki skul” ka la ong.
Haba kylli, ka la bynrap “Nga tharai nga la pynkhreh bha. Ka long kaba suk bha ïa nga, watla ki don katto katne ki jingkylli kiba eh ha ki katto-katne ki sobjek. Hynrei baroh hi ka dei ka eksam kaba suk. Lada phi pule, phin lah ban kamai mark”.
“Nga thmu ban pass ïa ka CUET bad leit sha ka University ban pule Political Science bad khatduh ngan ïakhun ïa ka eksam Civil Service” ka la ong “Nga kwah ban long ka ophisar Civil Service. Nga ju peit bha ïa ki interview UPSC bad nga la pynkreh ïa ka UPSC General Knowledge Quiz, namar ka long kaba kongsan ïa nga na ka bynta ban pynkhreh ïa ka CUET”.
Na ka liang ka Principal ka St. Mary’s Higher Secondary School, ka Sister Sonia Chacko ka la ai ka jingïaroh ïa ki khynnah kiba la poi ha ka kyrdan ba hakhmat ha kane ka risol, da kaba ai mynsiem ïa ki, ba kidei ban nang trei shitom bad ban don ka jingthmu kaba kham shalor.
Ka Class Teacher jong ka Megashree Roy ka la ïathuh ba ka Megashree Roy, kadei ka khynnah kaba trei shitom bad ka khynnah kaba sngewrit. Ka la pynpaw ba ka sngewkmen palat ïa kane ka risol kaba bha ha ka Arts Stream na ka skul.
