Shillong, Jymmang 04
Ka Bharatiya Janata Party, Meghalaya ka la pynpaw ïa ka jingkmen ba ka party ka la lah ban jop ha ka Jylla West Bengal, da kaba ong ba ka dei ka jingjop ba shaniah ïa ka jingtieng bad kane ka jingjop ka pyni ïa ka jingkyntait ba pura ïa ka jingpyrshang ban pynsngewbha, kaba pynshlur ïa ki briew ban rungtuh, ka bor jong ka pisa bad ka saiñ pyrthei da ki kam bym ïahap.
Ka BJP Meghalaya ka la ai burom ïa u Dr. Syama Prasad Mookerjee da kaba ong “Ka jingangnud jong u ban ïoh ïa ka Bengal kaba kynthup lang bad ka India ka la urlong ha kane ka sngi.”
Ka BJP Meghalaya ka la kynmaw burom ruh ïa ki nongtrei barim ka BJP kiba la shah pynïap hapoh ka Jylla West Bengal. “Ngi kynmaw burom ïa ki spah ngut ki nongtrei ka BJP, ki bahaïing hasem jong ngi, kiba la aiti ïa la ka jong ka jingim ban pynthikna ïa ka jingjop jong ka BJP ban wanrah ïa ka lawei ba phyrnai hapoh ka Jylla West Bengal” ong u nongaiktien ka BJP Meghalaya u Bah Mariahom Kharkrang.
“La knieh noh ïa ki na ngi da ki kam pyntriem bad da ka synshar kaba sniew bad kaba shyrkhei, hynrei ka jingkynmaw ïa ka jingaiti lut jong ki ka long kum ka jingai mynsiem ïa ki nongtrei ka BJP ha man la ki jaka.”
Haba shim ïa ka risol kum ka jingjop kaba la thaw ha ka histori jong ka saiñ pyrthei ha West Bengal, u Bah Kharkrang u la ong, “Ki briew jong ka West Bengal ki la rai ban pynïahap ïalade bad ka jingangnud jong u Myntri Rangbahduh ka Ri u Narendra Modi ban poi sha ka Viksit Bharat” u la pynpaw ka jingkhublei ïa ki paidbah ka West Bengal halor ka rai kaba ki la shim.
U nongïalam ka BJP u la kynthah ïa ka Trinamool Congress halor ka jingpyrshah jong ka ban leh ïa ka Special Intensive Revision (SIR) ïa ki thup kyrteng ki nongthep vote. “Ngi la ïohi ïa ka drama ba ka TMC hapoh ka jingïalam ka Mamata Banerjee ka la leh ha West Bengal halor ka SIR, watla la lah ban pyntreikam suk ïa ka ha ki 12 tylli ki Jylla jong ka ri” u la ong.
“Ngi kyrmen ba ki Liang Pyrshah mynta ki la sngewthuh ba ka saiñ pyrthei kaba sniew bad ki jinglamler kim treikam shuh” u la ong.
Haba ai burom ïa ki bor pahara ka Sorkar Pdeng ba pynïaid ïa ka ilekshon, u Bah Kharkrang u la ong “Ngi ai khublei kyrpang ïa ki bor pahara ka Sorkar Pdeng namar ha West Bengal ha ka sien kaba nyngkong ka la ïohi ïa ka ilekshon kaba suk, kaba khuid.”
Ka BJP Meghalaya ka la ai khublei ruh ïa ka BJP Assam namar ka la jop biang ha ka sien kaba lai da kaba ong ba ka jingsynshar kaba khuid, kaba bha bad ka synshar khadar kaba pynïajan ïa ki nongshong shnong ka jop ïa ki jingshah ïalam bakla na ka por sha ka por.
Haba kdew ïa ka jingthep Vote ki paidbah, u Bah Kharkrang u la pynpaw ba ka long kaba donkam ban kdew ba ki jaitbynriew riewngeit Khristan jong ka Jylla Assam ki la kyrshan ïa ka BJP, kane kan pynthikna ba kan sa paw sa ha Meghalaya ha ka ilekshon MLA 2028.
Ka BJP Meghalaya ka ai khublei ruh ïa u Myntri Rangbahduh ka Ri u Narendra Modi, u Myntri ka Tnat Kam Pohïing u Amit Shah bad u President ka BJP u Nitin Nabin halor kine ki jingjop jong ka Party.
