Shillong, Jymmang 04
Ka kynhun jong ka Meghalaya School Welfare Development Association (MSWDA) ka la leit ban aiti da ka jingthoh sha u Symbud Myntri Rangbah ka Jylla, u Bah Prestone Tynsong, kum ka jingpynkynmaw ïa ki jingdawa sha ka Sorkar haba ïadei ka jingpynbha ïa ki Secondary bad Higher Secondary School ha ka Jylla.
Haba kren sha ki nongthoh khubor u Bah H. M Marbañiang President MSWDA u la pynpaw ba ka seng ka sngewtynnad ban ïoh ïakren ïa u Symbud Myntri Rangbah, haba ïadei ki hynriew tylli ki mat jingdawa jong ki, ïa kaba u la kular bad pyntip ba ka Sorkar ka la dep ban shimkhia ïa ki Lower Primary bad Upper Primary School bad kyntu ruh ïa ka Sorkar ba kan pynbeit ïa ki jingeh jong ki Secondary bad Higher Secondary School.
U Bah Marbañiang u la pynkynmaw ba ïa kane ka mat ka MSWDA ka la dep ban pynsngew sha u Myntri ka Tnad Pule Puthi barim, u Rakkam A Sangma ha ka 4 tarik u Ïaïong 2025, ïa kaba u Myntri u la kular ban shimkhia bad kaba la pynlong ïa u Myntri Rangbah ban phah bishar biang ïa kine ki jingdawa ïa ka Tnad Pule Puthi bad u Commissioner Secretary.
Shuh-shuh u la ïathuh, haba ïadei bad kane na ka liang u Bah Prestone u la kular ba ka Sorkar kan leh eiei haba ïadei ki jingdawa, hynrei ba kin sa don ka jingïa ai jingmut kaba biang sha ka Sorkar khnang ba ka Kynhun Myntri kan lah ban ai jingmynjur, kumba ka la ai jingmynjur ïa ki LP & UP School.
U la kdew ba ki Secondary bad Higher Secondary School ki don 1400 tylli hapoh ka Jylla, katba haba nujor ïa ka jingdon ki LP & UP School ki don haduh 9000 tylli ha ka Jylla bad haba bynrap u la ong lehse ka Sorkar kan ym lah ban pynbeit ïa ki jingeh ha kajuh ka por, kumta kyrmen ba ka Sorkar kan lah ban pynbeit kawei hadien jong kawei.
U la pynpaw ïa ka jingsngewkhia haba ïadei ka jingjur ka jingpep skul shiteng por ki khynnah (Dropout) da kaba kdew ba kane ka jur bha haba ki khynnah ki la poi ha ka kyrdan Secondary bad Higher Secondary. “Kane ka jia namar ba ki kmie ki kpa kim lah shuh ban kyrshan lane ban pynbiang ïa ki jingsiew ha ki skul bad ki skul ruh kim lah ban pynïaid khlem ka jingïarap na ka Sorkar” u la ong.
U la bynrap ba ka Secondary bad Higher Secondary ka long ka nongrim ïa ka jingkiew jinghiar ka pule puthi ha ka Jylla, kumta ka MSWDA ka kyntu jur ïa ka Sorkar ban shimkhia ban pynbha ïa kane khnang ban lah ban kyntiew ïa ka pule puthi hapoh ka Jylla Meghalaya.
