Nga la ïoh bat kyrdan ba nyngkong ha ka exam HSSLC bad ka jingtrei shitom jong nga ka la seisoh: Priya

Shillong, Jymmang 04

Ka Samla Priya Ghosh na St. Edmund’s Higher Secondary School, Shillong kaba la wan ba nyngkong ha ka eksamin HSSLC, Commerce, ka la ong ba ka resol ba ka la ïoh ka pynpaw ïa ka jingkyrshan na ki bahaïing hasem bad ki nonghikai, kiba la pynwandur ïa ka jinglong bad ïa ka akor ba ka don.

Haba kren sha ki lad pathai khubor ha ka sngi Nyngkong jong ka taïew, ka 04 tarik u Jymmang 2026, ka Samla Priya Ghosh ka kdew ba ka jingjop jong ka kam dei eh tang ha ki marks ba ka ïoh.

Ka Priya Ghosh ka dei kaba la ïoh 458 marks bad kaba la wan ba nyngkong eh ha ka exam HSSLC, ha ka Commerce Stream.

“Nga la ïoh bat ïa ka kyrdan ba nyngkong ha ka eksamin HSSLC. Nga tharai ba ka jingtrei shitom jong nga ka la seisoh” la ong ka Priya.

Kumta ka Samla Priya ka la ai ka burom ïa ka ïing ka sem, bad khamtam eh ïa u hynmen, u Suman Das uba pynkhreh kot ïa ka naduh ka klas IV.

Ka la ong ruh ba “Ki nonghikai jong nga, ki kmie ki kpa jong nga, u hynmen jong nga, baroh ki la trei shitom bad ki la don ka bynta kaba khraw ban ym tang ban pynwan ïa ka jingpule jong nga, hynrei ki la pynrung ha nga ïa ki jinglong ba bha, ka akor kaba nga pyrkhat ba ngan ïai bteng ban bat nangne shakhmat ha ka jingim jong nga”

Shuh shuh ka la ïathuh ruh ba ka Class Teacher, ka ju pynshlur ïa ka haba ka shem jingeh, ka la pynshlur ïa ka ba kam dei ban kynran dien.

Ka Priya ka la kdew ba ka klas XI kadei kum ka jingsdang haba ïadei bad ka eksamin klas XII. “Ka nongrim ba nga ïoh naduh klas XI ka don ka bynta kaba kongsan ha ka jingjop bad nga la long kaba ïaineh ban trei shitom naduh ka klas XI. Ki nonghikai jong nga ki la ïohi ïa ka jinglah ha nga, ki ju pynshlur ïa nga. Ki dei ki mawsiang bad ki nongkyrshan jong nga,” ka la bynrap.

Haba kylli, ka Samla Priya kala ong “To bud ïa kaei kaba phi sngewtynnad, ieid ïa kaei kaba phi leh bad ai ïa kaba bha tam, katba phi lah ban leh. Bad ym tang ba phin long kiba bha ha ka kam jong phi, to long kiba bha kum ki briew bad ïarap ïa kiwei ban sngewthuh kata ruh ka pynlong ïa phi u wei na ki nongjop”.

Ka Samla Priya ka la pynpaw ba ka kwah ban leh Research ha ka Finance, hynrei ka sngewtynnad ruh ban phaikhmat sha ka Public Service.

Haba ïadei bad ki jingpyndonkam ïa ki rynsan Social Media, ka Samla Priya ka pynpaw ba donkam ban bate ïa ka por haba pyndonkam ïa ki.