Shillong, Jymmang 04
Ka Samla K Gwyneth W Rymbai, kaba la poi ha ka kyrdan Top-10, ha ka exam Higher Secondary School Leaving Certificate (HSSLC) na ka Arts Streams, ka la pynpaw ïa ka jingsngewkmen namar ba kam shym la khmih lynti ba kan poi sha kane ka thong.
Haba kren sha ki lad pathai khubor ka la ong “Nga ainguh ïa u Blei nyngkong eh, uba la don ryngkat bad ban poi shaduh kane ka thong, ïa ki nonghikai, ki bahaïing hasem, kiba la ïa don lang ban ai ka jingkyrshan ban leh bha ha kane ka exam”.
“Ka rukom khreh kot jong nga kam dei da ki kynta ban buh por hynrei nga kham shimkhia bha ha ki test, ki project work namar kine ki kyntiew ha ka rukom pass ha ka exam final,” la ong ka Samla K Gwyneth W Rymbai.
Haba kylli, ka Samla K Gwyneth W Rymbai ka la ong “Nga don ka jingthmu ban pyndep shuwa ïa ka Degree bad ka jingkwah ka long ba ngan long kaba poi sha ka thong halade”.
