Shillong, Jymmang 04
Ka Seng Khasi Higher Secondary School ka pynpaw ïa ka jingkmen kaba khraw hadien ba ka samla Phibarisha Dkhar ka la ïoh ha ka kyrdan ba 9 ha ka risol jong ka Higher Secondary School Leaving Certificate (HSSLC Science Stream) ba la pynmih da ka Meghalaya Board of School Education (MBOSE).
Naduh u snem 1995 ba la seng ïa ka Science Stream ha Seng Khasi Higher Secondary School, ka samla Phibarisha Dkhar ka dei ka samla ba nyngkong ba la lah ban wanrah nam ïa ka kolej da kaba ïoh rung ha ka thup Top 10 jong ka risol HSSLC 2026.
Ka Samla Phibarisha Dkhar ka dei ka khun ba saw jong u Bah Howis Marsing bad ka Kong Manju Dkhar kiba shong ba sah ha Mawlai Nongkwar Block-8.
Haba ïakren ka samla Phibarisha ka la ïathuh ba ka ïoh heh mark duh ha ka sobjek jingkheiñ (Mathematics) kaba ka la ïoh haduh 99 na ka 100 mark. Ka la pynpaw ba ka ju pynlut por 4 kynta ha ka shisngi ban pule kot bad ka la ong ban ïoh ki mark kiba heh kaba donkam ka long ban pynleit jingmut bad ban long shlur ban kylli bad pan jingïarap na ki nonghikai. Haba ïadei ki jingthmu bad jingangnud, ka samla Phibarisha ka la ïathuh ba ka kwah ban leit pyntbit ïalade ha ka lain ‘Medical’ da kaba ïakhun lyngba ka bhah ba la mang da ka Sorkar (Govt Quota) khnang ban lah ban pynbha bad ban kham pynjanai shuh-shuh ïa ki jingpule ba shakhmat.
Ka la pynpaw ruh ka jingsngew kmen kaba khraw ba ka la lah ban ïoh ha ka kyrdan ba 9 jong ka risol HSSLC 2026, ka la ai burom ïa ki nonghikai kiba la ai jinghikai ha skul bad ïa ki kmie ki kpa kiba ju ai mynsiem na ka por sha ka por kiba la pynlah ïa ka ban poi haduh kane ka kyrdan.
Haba ïakren ïa ka Kong Sharawanda Shabong ka nonghikai ha ka subjek English jong ka Seng Khasi Higher Secondary School ka la pynpaw ka jingkmen kaba khraw na ka jinglah ka samla Phibarisha ban wan shakhmat ha kane ka risol HSSLC 2026.
Haba bynrap ka la pynpaw ba ha ki snem kiba la dep ki nonghikai jong ka Seng Khasi ki la ju don ka jingphohsniew ban don ki khynnah ban poi ha ka thup Top-10, hynrei kane kam urlong satia bad dei ha une u snem lyngba ka samla Phibarisha Dkhar kaba la lah ban ïoh ha ka kyrdan ba 9 bad pynpaw ba ka dei ka sien ba nyngkong ïa ka Seng Khasi Higher Secondary School ban ïoh rung ha ka thup Top 10.
