Jowai, Jymmang 04
Ka North Liberty Higher Secondary School, kaba don ha Mookyrdup-Jowai, West Jaiñtia Hills District, sa shisien kala paw biang ha ka risol Higher Secondary School Leaving Certificate (HSSLC) kaba la pynbna da ka Meghalaya Board of School Education (MBOSE) ha ka 4 tarik Jymmang.
Arngut ki khynnah ka North Liberty Higher Secondary School, Jowai ki la ïoh ban rung biang ha ka thup Top-10 ha ka Science bad Arts Stream.
Ha ka Science Stream ka Hakiru Challam kala wan ha ka kyrdan kaba 8 da kaba ïoh 454 mark, katba ha ka Arts Stream ka Mewarica Pariat kala wan ha ka kyrdan kaba 10 da kaba ïoh 431 marks.
Halor ka jingjop jong ki, kine ki arngut ki samla pule ki la ai burom nyngkong ïa U Blei bad aikhublei ruh ïa u Principal, bad ïa baroh ki nonghikai, ki bahaïing hasem bad ki paralok kiba la kyrshan bad don barabor ha syndah ha kane ka jingïakhun ka jong ki.
Ka Hakiru ka la ïathuh ba ka la sngew lyngngoh bad dap da ka jingkmen haba ka para jong ka, ka la pyntip ïa ka shaphang ka risol, khamtam hadien ba ka la ïoh distinction ha baroh ki sobjek bad rung ha ka thup Top-10. Ka la pynshlur ruh ïa ki para samla pule ban don ka jingïaishah ha ki por ba ïakynduh ïa ki jingeh bad ban long kiba aiti ha ki thong jong ki.
Ka Mewarica Pariat ka la ïoh distinction ha baroh ki sobjek bad ka la ïoh ruh ïa ka mark kaba heh tam ha ka sobjek Geography. ‘Ka jingjied ïa ka Arts stream kam long kaba suk, kumba ki briew ki pyrkhat ba ka Arts Stream kam dei ka bynta kaba bha ban jied hynrei ka la ïai neh bad mynta ka sngew sarong ïa ka rai kaba dei jong ka,” la ong ka Mewarica Pariat.
Ka Mewarica Pariat ka thmu ban pule ïa ka LLB bad ban pynkhreh ïa ki eksamin UPSC. Ka la pynshlur ïa ki para samla pule kiba pule Arts stream ban ngeit ha lade, ban ïai aiti bad trei shitom, bad ban kut jingmut skhem namar kane ka ïalam sha ka jingjop.
U Principal ka skul u Ma Richard B Uriah u pynpaw ka jingsngew sarong bad jingkmen kaba khraw halor ka jingjop jong ki khynnah skul khamtam ha ka West Jaiñtia Hills district kaba la ïoh palat 90% ha baroh ki Stream.
U la ïathuh ba na ki 58 ngut kiba ïakhun ïa ka eksamin ha ka Science Stream, kiba wan ha ka kyrdan 1st Division ki long 54 ngut, 2nd Division 3 ngut bad kiba ïoh Distinction ha ka subject English 35 ngut, Khasi 30, Alternative English-1, Maths 18, Chemistry 9, Biology 12 bad Physics-1.
Katba ha ka Arts Stream kiba ïakhun ki don 55 ngut, kiba wan ha ka kyrdan 1st Division 44 ngut, 2nd Division 11 ngut, kiba ïoh distinction ha ka subject English 6, Khasi 7, Alternative English-2, Sociology 18, Political Science-1, Education 16, Geography-2, Economics-1 bad Elective Khasi -1.
