Shillong, Jymmang 04
Ka kynhun jong ki nonghikai bad ki nongtrei ha ki kolej ha ka 4 tarik Jymmang 2026 ki la pynlong da ka jingïakhih kaba jai-jai ban pynpaw ïa ka jingbym sngew ïahap jong ki ïa ka Meghalaya Non-Government School & College Employees Centralised Provident Fund Scheme 2026 (CPF 2026) ba la wanrah da ka Sorkar bad dawa na ka Sorkar Jylla ba kan pynkylla biang sha ka Draft Scheme kaba la mynjur ha u snem 2023.
Ïa kane ka jingïakhih ba la pynbeit da ki nonghikai Skul bad Kolej, ki nongtrei ha ki Skul bad Kolej kiba hap hapoh ka Deficit Grant-in-aid, la pynlong ïa kane ka jingïakhih ha ki skul bad ki kolej ha kylleng ka Jylla Meghalaya.
Kum ban shu kdew ïa kane ka Skhim u Myntri Rangbah ka Jylla u Conrad K Sangma u la pynbna dang shen ha ka jingïalang ki nonghikai kaba la long mynha ka 1 tarik u Jymmang 2026.
Haba ïoh ban ïakren ïa u Bah P Syiemlieh President ka MCTA Sankardev College, u la ïathuh ba kane ka jingmih jong ki ban ïakhih ka long tang ban pynsngew sha ka Sorkar ba ki khlem ïoh ïa ka hok kaba dei ka jingmyntoi jong ki hadien ba ki la shongthait.
U la pynpaw ki don artylli ki jingtyrwa na ka liang jong ka Sorkar, kata ka long ba ka Draft Scheme 2023, ha kaba ki nonghikai skul bad kolej kumjuh ki nongtrei ki la ai ka jingmynjur, katba ka Sorkar ka la pynmih pat da kawei pat ha u snem 2026, kaba ki la pynpaw ba kim sngewïahap ban pyntreikam, namar ba kam long shai kumba la dep ban mynjur ha u snem 2023.
Haba bynrap haba ïadei kane ka jingïakhih ka Kong Ibapynhun Thabah General Secretary ka Meghalaya College Non-Teaching Employees Association (MCNTEA) ka la pynpaw ba kim ïahap ïa ka jingwanrah jong ka Sorkar da kaba kdew ba ka la pynduh noh ïa kaei kaba ki la dep hun ha ki por ba la dep.
