Shillong Jymmang 05
U President ka NPP Youth Wing uba dei u Myntri ka Sorkar Jylla u Bah Wailad Shylla u la ïathuh ba ka NPP kan sa shim ïa ka rai ba khatduh jong ka jingïakren halor u kyrtong jong ka ban ïakhun ïa ka ilekshon MP shiteng samoi na Shillong, ha kaba ka jingpynbna ka lah ban long hadien ka jingïalang ka General Executive Meeting ban long ha ka 7 tarik mynta u bnai.
“Ngi la poi ha ka bynta bakhatduh jong ka jingïakren ban sei ïa u kyrtong, kumta nga sngewbha ban kyrpad ban ïai shah bad ngi tang shisngi ne ar sngi, ba ngin sa pynbna,” la ong u Bah Wailad haba ïakren bad ki nongthoh khubor.
Halor ka jingkynnoh ba ka kyrteng jong u James Sangma ka la mih na ka bynta ka shuki Rajya Sabha, u Bah Wailad u la ong ba ki jingïakren ki dang ïaid bad ka rai kaba khatduh ka shong ha ki nongïalam jong ka seng.
“Ka jingïakren ka dang ïaid, kumta khlem artatien ka kyrteng jong u ka la wan hynrei nga tharai ba ka shong ha ka ‘high command’ jong ka seng ban shong bad pynkut ïa ki kyrteng”, u la ong.
U la ong ba 4-5 tylli ki kyrteng ki dang don ha ka jingbishar na ka bynta ban pynïeng kyrtong sha Rajya Sabha. “Kumba ka long mynta ki don 4-5 tylli ki kyrteng kiba la mih kiba nga pyrkhat ba ka long kaba kloi bha ïa nga ban ïasam kumta nga pyrkhat namar kumba nga la ong ka shong ha ka high command ka seng ban shong bad rai”, la ong u Bah Wailad.
