Shillong, Jymmang 05
Ka Hynñiewtrep Integrated Territorial Organization (HITO) ha ka 05 tarik u Jymmang 2026, ka la phah da ka jingthoh sha ka National People’s Party (NPP), kaba ïalam ïa ka Sorkar mynta, ban ai jingmut haba ïadei bad ka tiket ilekshon shiteng samoi na Shillong Parliamentary Konstitwensi sha Lok Sabha.
Haba kren sha ki lad pathai khubor u Bah Donbok Dkhar, President, u la ong, ba ka seng ka sngewtynnad ïa ka jingtyrwa tiket ka NPP ïa u DRL Nonglait, uba dei u President ka Khasi Author Society (KAS).
U la ai jingmut ïa ka NPP, ba kam dei tang ban ai tiket ha ka ilekshon ban ïa aireng ha ka ilekshon Lok Sabha ïa u DRL Nonglait, hynrei ka dei ruh ban pynrung noh ha Rajya Sabha hadien ba la shongthait noh u Dr.Kharlukhi.
“Lada ka NPP ka don jingmut shisha bad ban ïohi jngai ïa ka ri bad ka jaitbynriew, kan kham bha shuh-shuh ban pynrung ïa u DRL Nonglait sha Rajya Sabha,” la kynthoh u Bah Donbok.
U la ong ba ym dei ban ai da ka tiket MP ïa u DRL Nonglait ban ïakhun ha ka ilekshon shiteng samoi hynrei dei ban pynrung syndon sha Rajya Sabha.
“Lyngba ka shithi ba ka HITO ka la phah sha ka NPP, ngi sngew dei ba ka NPP hi, kadei ban tyrwa beit ha ka Rajya Sabha ïa ka kyrteng u DRL Nonglait, namar ba u dei uba la ïaid bad buddien ïa ka jingpynrung ïa ka ktien Khasi ha ka Khyrnit kaba phra,” u la bynrap.
