Shillong, Jymmang 05
Ka jingpynlut ïa ka Phase-I jong ka New Shillong Water Supply Scheme kala kiew da T.217 klur sha ka T.770 klur, namar ka jingpynkynriah ïa ka dam, ka jingring bording bad ka jingthied jaka. Ïa kane ka jingmang pynlut ba thymmai la ai jingmynjur da ka Kynhun Myntri ha ka sngi Ba-ar.
U Myntri bad nongaiktien ka Sorkar MDA Bah Wailadmiki Shylla u la ong, ka jingmang pisa ba hashuwa ka long T.553 klur.
“Ka Kynhun Myntri kala mynjur ïa ka jingmang pynlut ba thymmai jong ka New Shillong Water Supply Scheme Phase-I. Kane ka jingmang ba thymmai ka long T.770 klur na ka T.553 klur,” u la ong.
Ïa ka jaka shna dam la hap ban pynkynriah noh shaneng jong ka wah hadien ba ka Sorkar kala ithuh ïa ka Nonghali kum ka jaka kaba biang eh ban buh ïa ka jaka theh ñiut katkum ka juk saian.
“Kane ka dei namar ka jingpynkynriah ïa ka jaka ban shna ïa ka dam ha kaba ngi la hap ban rah shaneng jong ka wah da ka jingang jong ka jaka theh ñiut katkum ka juk saian ha Nonghali,” ïathuh u Bah Wailad.
Kila don ruh kiwei ki jingpynlut na ka bynta ban pynïaid ïa ki lain bording na ka bynta ka project. Ka jingdonkam ban thied jaka ruh kala nang pynheh ïa ka jingmang pisa.
“Ngi hap ban don ïa ki lain bording ba dei thik ïa kane ka kam-kane ruh kala nang pynheh ïa ka jinglut bad ha kajuh ka por namar jong ka jingthied jaka naba ngi donkam bun ka jaka,” u la ong.
Ha ka por ba rai ban pynkynriah, u Bah Wailad u la ong ba ka jaka ban pynlong jaka theh ñiut ka dei kaba wan hadien bad ym pat shym la shim rai satia ha ka por ba plan ïa ka Water Supply Scheme.
“Kane ka long namar hashuwa ka rai ïa ka jaka theh ñiut, shibun ki EOI kila wan. Kumta ha katei ka por, ngim tip satia kano ka jaka ka dei kaba biang eh. Ynda kila leit sorjamin kila tip ba ka Nonghali ka dei kaba biang,” u la ong.
U bynrap ba ka plan jong ka tnad PHE na ka bynta ka Water Supply Scheme kala dep don lypa hashuwa katei ka jaka theh ñiut.
