Jowai, Jymmang 05
Ka Voice of the People Party (VPP) kala byrthen ban ker tawiar ïa ka Secretariat ha kano kano ka por, lada ka Sorkar MDA-II hapoh ka jingïalam jong ka National People’s Party (NPP) kam pyntreikam ïa ki 10 tylli ki mat jingdawa kynthup lang ruh ka Reservation Policy bad ka jingeh jong ki nongkhaïi dewïong bad nongtrei maw trei shyiap.
Ïa kane la ïathuh da u Nongïalam ka VPP u Bah Ardent Miller Basaiawmoit haba kren ha ka jingïalang kaba la long ha Iawmusiang, Jowai ha ka sngi Ba-ar ka 5 tarik Jymmang.
Lada ka Sorkar kam leh eiei halor ki mat jingdawa, ka thong bad ka jingpynkhreh jong ka VPP ka long ban ker tawiar ïa ka Secretariat ha ki sngi ki por ki ban wan, la ong u Bah Ardent.
“Ngin pynkohnguh ïa kane ka Sorkar mutlop, ka Sorkar leh donbor ba kan pyndep ïa kine ki jingdawa lym kumta ngin nym kynriah na ka jaka ba ngin ker tawiar, ym dei shuh tang da ki hajar ne da ki phew hajar ngut, hynrei ngin sei ïa u paidbah da ki lak ngut ban leit tur bad ker tawiar ïa ka Secretariat”, la ong u Bah Ardent.
Haba kren ha ka jingïalang u Bah Ardent u la pynshai paidbah ba ka VPP ka dawa na ka Sorkar MDA ba ka dei ban pynduh pyndam ïa ki projek ha Lumpongdeng bad ym dei ban pyntreikam ïa kino kino ki projek khlem ka jingmynjur jong ki paidbah.
Ban sangeh noh ban pynshitom ïa ki nonghikai kiba la shakri slem ha ka kam ba kin hap ban pyndep ïa ka MTET kaba long ka bym don nongrim bad kaba pynduh mynsiem, ha kajuh ka por ban weng noh mardor ïa ka Meghalaya Private College Act 2025 kaba ktah ïa ka bor jong ki jaka ai jinghikai.
Ban pynduh pyndam ïa ka jingdon bynta saiñpyrthei ha ka jingthungkam lyngba ki DSC bad MPSC, bad ban weng ïa baroh ki dkhot kiba don ka jingïadei bad ka saiñ pyrthei, ban sangeh noh ka thung kam ïa kiba la shongthait namar ka khanglad ïa ki samla khlem kam khlem jam.
Nalorkata ban ïada ïa ki jaka paidbah, ban sangeh mardor ïa ka jingai wai bad ka jingthied beaiñ ïa ki jaka puta paidbah bad ban ym ïaid lait ïa ki Autonomous District Council ha ki kam khyndew.
Ban shim mardor ïa ki sienjam ban tehlakam ïa ka jingwan rung kyrthep ki briew kiba nabar sha ka jylla Meghalaya, ban pynsangeh mardor ïa ki karkhana coke bad karkhana pynmih dewbilat kiba thymmai na ka bynta ban ïada ïa ka mariang bad ka koit ka khiah jong ki paidbah.
Ka Sorkar ka dei ban wad ruh ïa ki mynder ri kiba don ha Meghalaya bad phah biang ïa ki sha ki jaka kaba ki wan.
U Bah Ardent u la ong ruh ba ka VPP kam klet satia ïa ka mat kaba ïadei bad ka Reservation Policy da kaba ong, ki don kiba ong shano jah ka Reservation Policy ha ki phra tylli ki mat jong ka VPP.
Halor kane, u la pynkynmaw ba kane ka jingïakhih ka dei kaba ki la ïakhih ha u snem 2023 ha kaba ka Sorkar ka la hap ban pyndem da kaba thaw ïa ka Expert Committee bad ka Committee ka la phah ïa ka kaiphod sha ka Sorkar ha u bnai Jylliew 2025.
