Jowai, Jymmang 05
“Hap ban hikai skul ïa u MLA jong ka Jowai bad MLA jong ka Nartiang ba kin tip kaei ka politik, lada kim pat sngewthuh nga long uba kloi ban ai ‘Private Tuition’ hapoh ophis jong nga ba kin sngewthuh shaphang ka politik,” la ong u Bah Ardent M Basaiawmoit.
Ïa kane u Bah Ardent u la ong haba kren ha ka jingïalang pynshai paidbah ïa ki mat jingïakhih ka Voice of the People Party (VPP) kaba la long ha Iawmusiang, Jowai ha ka 5 tarik Jymmang.
U Bah Ardent u la ong ba u Symbud Myntri Rangbah uba dei ruh u MLA ka Nartiang bad u Bah Wailadmiki Shylla MLA ka Jowai uba dei ruh u Myntri Sorkar ki ong, ba kine ki VPP ki leh politik ban khring vote, hynrei ka politik jong ki, ka dei beit tang ka ilekshon ban shong hapoh Secretariat.
U paidbah u khlem jied ïa u MLA ka Jowai bad MLA jong ka Nartiang ba kin ïa pynheh spah ïalade, la jied ïa ki ba kin shakri ïa u paidbah, ba kin ïada ïa u paidbah, hynrei ym ban knieh kam na u paidbah, la ong u Bah Ardent.
Shuh shuh u Bah Ardent u la ong, 15 snem mynshwa u MLA jong ka Nartiang uba dei ruh u Symbud Myntri Rangbah ka Jylla ym ju ïohi koit ba un leit sam Work Order sha ki paidbah, hynrei mynta la jan man ka taiew u leit namar ba u tieng eh ïa u Prah.
U la ong ba ki paidbah ka Nartiang ki ïathuh ha u Bah Ardent ba kane ka dei tang ka skhim 5 snem hynrei ki paidbah ka Nartiang ki kylli shano jah ka 15 snem ka MLA skhim naduh u 2008.
