Nongstoiñ, Jymmang 05
Ha ka sngi Ba-ar ki nongshong shnong jong ka shnong Umdang ha West Khasi Hills ryngkat ka jingïasnohktilang bad kiwei pat ki shnong kiba marjan bad kiba na katei ka thaiñ ki la mih paidbah ban pynrem ïa u riewthrang snam uba la pynïap dusmon ïa u heprit Endrixsonfelix Mawsor uba dang 3 snem tam katba u dang wan phai na skul.
Kum ka dak ban pynrem ïa u riew thrang snam, la sdang da kaba ïaid rally na madan skul Rorin Govt. Umdang ter ter sha Parish Compound bad la pynkut pat da ka jingïalang paidbah kaba lyngkot ha ïew Umdang kawei na ki shnong kaba don ha ka thaiñ Shahlang, Mawshynrut West Khasi Hills District.
Ha kane ka sngi la ïashimbynta naduh ki khynnah na ki skul bapher bapher, ki seng longkmie, ki sengbhalang bapher bapher jong ka thaiñ kiba kynthup ïa ka All Lyngngam Organisation bad kiwei, kumjuh ki riew rangbah ka thaiñ kiba la ai jingkren ha ka jingïalang.
Ha kane ka sngi shuwa ban pynlong ïa ka jingïalang la pynlong ïa ka jingsngap jar kaba shi minit bad la thang ruh ïa ki mombati bad ïa ka jingïalang la pynlong da ka seng samla shnong Umdang Pyllun.
Lah ban kdew hangne ba katei ka jingjia ka la jia myn ha ka 22 tarik u Ïaïong 2026 ha kaba u Imphal Mawsor uba la 50 snem ka rta uba dei u para kur ïa kaba u heprit Endrixsonfelix Mawsor u shait khot Mama, u la pom da ka wait na ka khlieh bad la ong ruh ba utei u khynlung u la ïap hashen.
U Bah Kodang Rashir, President ka Synjuk 48 Shnong haba kren u la ong ba kane ka dei ka sien kaba ar ha ka dong ka thaiñ ha kaba kum kitei ki jingjia ki jia hynrei lada phai ha ki bor jong ka aiñ kane ka jingïaid rally ka noh mynsiem hynrei watla katta ruh, “Nga kyrpad ïa ka bor jong ka aiñ ba kin nym dei ban aili, ka don ka aiñ ïa kita ki riew sniew ïa ki briew kiba pynïap ka aiñ jong ka Sorkar ka don ka bor ban pynshitom na ka bynta jong ki,” ong u Bah Kodang.
Shuh shuh u la ong, “Nga kyrpad ïa ki kur ki jait ba phin ym dei ban ïasnohkti lang bad ki riew bymman” da kaba u la bynrap ban ong “Ngi kwah ba kane ka rally ka jong ngi kan pynsngew sha ki bor jong ka aiñ”.
U Bah Kodang u la kyntu ruh ïa ki longkmie ki longkpa, ki nongïalam shnong ban ïatreilang ban rad dyngkhong ïa ki jingsniew khnang ba yn lah ban jop ïa ki jingsniew.
