Nongpoh, Jymmang 05
Ki nongïalam lem bad ki dkhot jong ka Hynñiewtrep Achik National Movement (HANM) Western Ri Bhoi hapoh ka jingïalam u Bah Sumar Lyngdoh kum u President ha ka sngi Ba-ar kila shim ïa ka rai ban khylliap lama noh ïa ka HANM Western Ri Bhoi namar ka jingbym sngew ïahap jingmut bad ka rukom treikam jong u President ka Sengkmie Bah Lamphrang Kharbani.
Nalor u Bah Sumar Lyngdoh uba dei ruh ha kajuh ka por kum u Vice President ka HANM Ri Bhoi District, kiwei ki nongkitkam ka HANM Western Ri Bhoi kiba la shim rai ban khylliap lama noh ïa ka seng ki kynthup ïa u Bah Prishon Makri Vice President, Bah Anthony Sankli General Secretary, Bah Upsait Rani Assistant General Secretary, Bah Phrangsngi Lyngdoh Joint Secretary, Bah Banshan Sohkhwai Education Secretary, Bah Wanshan Rani Sports Secretary, Sonday Sangma Chief Organising Secretary, Bah Rony Makri Organising Secretary, Bah Plomstar Mawblei Publicity Secretary lem bad 23 ngut ki dkhot.
Haba kren sha ki lad pathai khubor, u Bah Sumar Lyngdoh u la pynpaw ba na ka liang jong u lem bad baroh ki dkhot ka Western Ri Bhoi kim don satia ïa kano kano ka daw pyrshah ïa ka seng, hynrei ka jingmih noh ka jong ki na ka seng ka dei namar ka jingbym sngewtynnad bad bym sngewïahap ïa ka rukom pynïaid kam jong u President ka seng, u Bah Lamphrang Kharbani.
Haba pyrshang ban kylli, hato kiei ki jingleh jong utei u President ka seng kaba la pynlong ïa ki ban shim ïa ka sienjam kat haduh ban khylliap noh ïa ka seng, u Bah Sumar Lyngdoh u la jubab ba um kwah satia ban thad madan ïa kiei kiei ki jingleh jong utei u President, naba kan long ka jinglehraiñ ïa ka seng hi baroh kawei.
U la ïathuh ruh ba kum ki dkhot ka seng, kila ju pyrshang ban ïakren sngewthuh bad utei u President ka seng ban pynbha bad pynïaid beit ïaid ryntih ïa ka rukom treikam ban shakri ïa ka jaidbynriew, hynrei ki la shu kut tang ha ka jingïakren bad khlem poi shano shano, kaba la pynlong ïa ki ban sngew dap ram bad ym lah shuh ban don ïa ka jingïatreilang kumba dei ban long.
“Kumta da kawei ka jingmut, ngi la shim syndon ïa kane ka sienjam kaba eh, ba ngin hap ban khylliap lama noh ïa ka HANM Western Ri Bhoi bad ba ngin nym ïadon bynta shuh bad ka seng naduh kane ka khyllip mat kaba mynta,” la ong u Bah Sumar Lyngdoh.
