Shillong, Jymmang 05
Shisngi hadien ba ka Trinamool Congress (TMC) ka la shah rem noh ha ka BJP ha ka ilekshon ha West Bengal, ka Nongïalam ka TMC ka Mamata Banerjee ka la pynbna ba kan nym hiar satia na ka shuki kum ka Myntri Rangbah, naba ka ilekshon kam shym long kaba khuid bad kynnoh ba ka don ka jingleh thok.
“Ngim shym la shah pynliem satia. Ngan nym hiar shuki. Kam mih satia ka jingkylli ba ngan leit mih sha ïing u Lat,” la ong ka Mamata Banerjee ha ka jingïakynduh bad ki lad pathai khubor.
Kumba ka ju long baroh shikatta, hadien ka ilekshon sha ïingdorbar, ki Myntri Rangbah kiba shah rem noh, ki ju leit sha ïing jong u Lat ha Lok Bhavan ban aiti noh ïa ka shithi iehnoh kam ha u Lat.
Katba na ka liang ka Mamata Banerjee ka la kynnoh ba u Myntri Rangbahduh ka Ri u Narendra Modi bad u Myntri tnad Kam Pohïing u Amit Shah ki la tuklar beit beit ha ka ilekshon ha West Bengal, bad ba u Chief Election Commissioner u Gyanesh Kumar u la dei uwei na ki ‘villain’ ne u Gang jong kane ka ilekshon.
Ka Mamata ka la kynnoh ba ki kyrtong ka Trinamool Congress (TMC) kynthup ïa ka, ki la shah ktah kti hapoh ki ‘counting centres’ bad ba la tuh ïa ki vote lyngba ka jingleh thok ha ki kor EVM bad ka la ong ruh ba ha kane ka ilekshon ka BJP bad ka Election Commission ki la leh ïa ki kam jaboh da kaba ki la shu kurup jubor ïa ki vote.
Ka Mamata Banerjee ka la kynnoh ruh ba ki nongtrei jong ka BJP ki la thombor ïa ki shlem treikam jong ka TMC bad ruh ban thombor wat ïa ki nongtrei jong ka ha kylleng ki bynta jong ka Jylla hadien ba la dep pynbna ïa ka risol ilekshon.
“Ngi la rai ban thaw ïa ka Fact Finding Committee jong ki 10 ngut ki dkhot, ki ban leit jurip ïa ki jaka ba shah thombor. Ha kane ka committee kin don ruh san ngut ki MP,” ka la ong bad bynrap ba kan nym ailad satia ïa ki kam bymman jong ka BJP.
