Nongpoh, Jymmang 05
Ka ophis jong u Superintendent of Police ka Ri Bhoi District ha ka sngi Ba-ar kala pynlong ïa ka prokram lyngkot kaba kyrpang ban pynkup burom ïa ki khynnah skul bad nonghikai jong kawei ka skul kiba la ïadon bynta ban pyllait im ïa iwei i khyllung ba dang shu kha, iba la shah tep im ha kawei ka shnong kaba hap ha Ri Bhoi District ha kine ki khyndiat sngi ba la dep.
Kumban shu kdew, ha ka 27 tarik jong u bnai Ïaïong 2026, kitei ki khynnah skul lem bad ki nonghikai ki la ïohsngew ïa ka jingiam jong i khyllung rit iba la shah tep hapoh khyndew bad kumta mar mar ki la pyrshang ban sei ïa i bad ïoh ban pyllait im. Kumba long mynta itei i khyllung i la lait na ICU, hynrei i dang don hapdeng ka jingsumar jong ki doctor ka Civil Hospital Nongpoh.
Ki pulit ki la ong ba dei lyngba ka jingshlur bad ka jingsted pyrkhat jong ki nonghikai lem ki khynnah kaba la pynlong ïa itei i khyllung rit ban lait na ka jingjia kaba sngewsih bad ba kum ka tnad pulit jong ka district, ka ai ka jingïaroh ïa ki halor kane ka kam shlur ka jong ki, ka ban long ruh ka nuksa ïa kiwei pat bad kum ka dak jong ka jingpynkup burom, la sam ruh ïa ki syrnod sha kitei ki khynnah skul bad ki nonghikai ruh kumjuh.
